د پاکستان د شخړو او امنیتي مطالعاتو انسټېټیوټ په دې هېواد کې د تېرې اکټوبر میاشتې د امنیتي پېښو راپور خپور کړی.
په دې راپور کې ویل شوي، په اکټوبر میاشت کې د تېرې سپټمبر میاشتې په پرتله په پاکستان کې د امنیتي پېښو شمېر ۲۹ سلنه زیات شوی او زياته شوې چې دا پېښې د پاکستاني پولیسو او تحریک طالبان پاکستان ترمنځ شوې دي.
د پاکستان د شخړو او امنیتي مطالعاتو انسټېټیوټ ویلي: « د اکټوبر په میاشت کې ټولټال ۴۵۸ کسان وژل شوي. د سپټمبر په پرتله د اکټوبر په میاشت کې د امنیتي پېښو کچه ۲۹ زیاته شوې. په سپټمبر کې ټولې ۶۹ امینیتي پېښې ثبت شوې وې، په داسې حال کې چې اکټوبر میاشت کې بیا دا کچه ۸۹ پېښو ته رسېدلې؛ خو د دغو بریدونو د انساني تلفاتو کچه بیا ۱۹سلنه راکمه شوې ده.»
راپور همدا راز زیاتوي، تېره اکټوبر میاشت کې په پاکستان کې د انساني تښتونو کچه ریکارډ کچې ته رسېدلې. د راپور پر بنسټ، د تحریک طالبان پاکستان(ټيټيپي) د بریدونو پر مهال ۵۵ تنه چې ډېری یې پاکستاني پولیس دي، ژوندي نیول شوي.
د پاکستان د شخړو او امنیتي مطالعاتو انسټېټیوټ ویلي: « د ټيټيپي له لوري بلوچستان، قبایلي سیمو، خیبر پښتونخوا، سند، پنجاب او شمالي سیمو کې د ۸۹ بریدونو پر مهال ۵۵ تنه چې ډېری یې پاکستاني پولیس دي، ژوندي نیول شوي او له ځان سره یې تښتولي دي.»
د پاکستان د شخړو او امنیتي مطالعاتو انسټېټیوټ په راپور کې دغه راز راغلي، په دغو امنیتي پېښو کې ټولټال ۷۲ پاکستاني عسکر وژل شوي او د عامو وګړو په ګډون شاوخوا ۱۵۰ تنه نور ټپیان شوي دي.
د چارو شنونکي بیا پاکستان کې روان وضعیت د دې هېواد د پوځي او حکومتي چارواکو ناکام سیاستونه بولي او په خبره یې، که دا هېواد د خپلو خلکو غوښتنې ونه مني، روان وضعیت به ډېرې ناوړه پایلې ولري.
پخوانی ډېپلومات عزیز معارج وايي: « د پاکستاني چارواکو، ملکي او نظامي ادارو د ناسمو پالیسیو او فساد له امله اوس د دوی ملت او قومونه چې ځینې یې اشغال دي او ځینې نور ناراضه دي، راپورته شوي او اجازه نه کوري چې دوی د دین او اسلام په نوم ناوړه ګټه پورته کړي.»
د سیاسي چارو شنونکی شهسوار سنګروال وايي: « که چېرې د پاکستان حکومت او پوځیان غواړي د تېر په څېر له هند او افغانستان سره د جګړو له لارې د خلکو ذهن مصروف وساتي او داسې ورته وښيي چې دا زموږ د ښمنان دي او د دوی د کنټرول لپاره باید موږ ته امتیازونه راکړل شي، دا حیله نوره کار نه کوي. اوس په پاکستان کې د ټيټيپي وسله وال پاڅون روان دی او خپلې غوښتنې لري.»
د پاکستان د شخړو او امنیتي مطالعاتو انسټېټیوت داسې مهال په دې هېواد کې د امنیتي پېښو د لوړې کچې خبر ورکوي چې د راپورونو له مخې د ټيټيپي یا تحریک طالبان پاکستان له لوري د خیبرپښتونخوا اړوند اورکزیو ایجنسۍ کې د پاکستاني پوځیانو پر موټریز کاروان وروستي برید کې له ۳۰ زیاتو پاکستاني پوځیانو د وژل کېدو ادعا شوې.
