د شیخ حسینې عوامي ګوند د دغو ټاکنو مخکښ و او په غوڅ اکثریت یې دا ټاکنې ګټلې دي.
اخوا اپوزیسیون ګوندونه دا ټاکنې نه مني او د بیاټاکنو غوښتنه کوي چې حکومت پکې کومه لاسوهنه و نه کړي.
د اپوزیسیون ګوند مشران دا ټاکنې له فساد ډکې بولي او د بیا ټاکنو غوښتنه کوي چې حکومت پکې باید بې پرې وي.
د اپوزیسیون مشر کمال حسین وویل ((دا کوم حالت چې د بې مانا ټاکنو له امله مخ ته راغلی دی، دا حالت باید سم شي، دا ځل باید حکومت بې پرې وي. نو موږ د ټاکنو له کمیسیون غوښتنه وکړه چې دا ټاکنې لغوه اعلان کړي او د بیا ټاکنو لپاره چمتو والی ونیسي.))
اپوزیسیون ډله وايي د ډیمو کراسۍ ډير اصول په دې ټاکنو کې تر پښو لاندې شوې دي.
هغوی وايي، د نوماندانو ناظران د رای اچونې مرکزونو ته دننه نه دي پریښودل شوي او د ځينو رای ورکوونکو د رای اچوونې مخه هم نیول شوې ده.
کمال حسین وویل ((ټولې ټاکنې په یو ډول نه یو ډول په ناسمه توګه کارول شوې دي. تاسې پوهیږئ؟ موږ ډيرې بدې ټاکنې درلودې. په اکثرو ځایونو کې د نوماندانو ناظرین د رای اچوونې مرکزونو ته نه دي پریښودل شوي. ان د نورو نوماندانو پلویانو ته د رای اچولو اجازه هم نه ده ورکړل شوې.))
په دې ټاکنو کې ۱۰۴ میلیونه کسان په شرایطو برابر وو او ځانونه یې راجستر کړي وو.
په دې ټاکنو کې په ځينو سیمو کې لاریونونه هم شوې دي چې لسګونو کسانو ته پکې مرګ ژوبله اوښتې ده.
