د راپورونو پربنسټ، په کوټه کې د بلوچستان پخواني اعلی وزير او بلوچستان ملي ګوند مشرعطاالله مېنګل د مړينې په کاليزه نمانځلو کې موټر بم برید شوې او لسګونو کسانو ته یې مرګ ژوبله اړولې.
د پاکستان ډان ورځپاڼې د پاکستاني سيمه یيزو امنيتي چارواکو له قوله راپور ورکړی چې بريد د غونډې له پای ته رسېدو ۱۵ دقيقې وروسته، غونډې ته نږدې د موټرو په تم ځای کې د بلوچستان ملي ګوند غړي او ګډونوال هدف ګرځولي.
چارواکو د ۱۳ کسانو د وژل کېدواو شاوخوا ۳۵ نورو د ټپي کېدو خبر ورکړی، خو د بلوچستان ملي ګوند اوسني مشر اختر مېنګل چې له پېښې روغ وتلی، پر خپله اېکس پاڼه د وژل شويو کسانو شمېر۱۵ تنه ياد کړي.
د بلوچستان ملي ګوند مشر اختر مېنګل وايي: « اې الله هغه کسان چې پر بلوڅو ظلم کوي ته يې نیست او نابود کړې او هغه کسان ورک کړې چې د بلوڅ مېندو او پلرونو نازولي اولادونه تښتوي او بيا يې جسدونو په کثافاتو کې غورځوي. اې الله ! ته هغه رياست ړنګ کړی چې موږ يې غلامان ګرځولي يو او دوی زموږ پر ژوند قصابي کوي.»
د راپورونو له مخې، دې غونډې ته د بلوڅ قومي او ګوندي مشرانو سربېره د پښتنو ځينې مطرح قومي مخورهم وربلل شوي وو چې له بريد روغ رمټ وتلي.
ازاد خبريالان وايي، بلوچستان په مرکز کوټه کې پي اېن پي ګوند پرغړيو د ياد برید مسوولیت لا هېڅ لوري په غاړه نه دی اخيستی.
ازاد خبريال طاهرخان وايي: « د برید مسوولیت خو تر اوسه چا نه دی منلی، له دې وړاندې هم په بلوچستان کې سیاسي مشران او غونډې په نښه شوې دي. له انتخاباتو لږ وړاندې یوه لویه چاودنه هم شوې وه چې مسوولیت یې داعش ډلې منلی و. کله نا کله سیاسي مشران د دې ډول حملو هدف ګرځي.»
د امنيتي چارو څارونکي په پښتنو او بلوڅو د پاکستان حکومت تاريخي ظلمونو ته په اشارې، ياد برید د پاکستان استخباراتي پلان شوې لوبه ګڼي او د دوی په خبره، په سيمه کې د خپلو ګټو خوندي کولو لپاره يې ترسره کوي.
د سياسي چارو شنونکی توريالی ځاځی وايي: « د دې بریدونو عامل د پاکستان پوځ او استخبارات دي. د پښتنو او بلوچانو په سیمه کې چې کومې وژنې کېږي، ټولې یې د پاکستان پوځ کوي. ګیله من وزیر او نور کسان چا ووژل؟ دا تهمت په بل هېچا باید ونه شي بلکې دا لوبې د پاکستان د استخباراتو کار دی.»
د سياسي چارو شنونکی شهسوار سنګروال وايي: « دا یو واقعیت دی چې داعش په بلوچستان کې روزنځایونه لري، د پاکستان د پوځ له خوا وسلې او پیسې ورکول کېږي او نه یوازې پر بلوڅانو بریدونه کوي بلکې کوشش کوي چې د افغانستان په ګډون د سیمې هېوادونه نا آرامه وساتي. »
ډان ورځپاڼې په بلوڅ قومي مشرانو د بريد ترڅنګ له ايران سره په پوله په يوه بمي چاودنې کې د ۵ پاکستاني پوځيانو د وژل کېدو او څو نورو ټپي کېدو خبر هم ورکړی. د دې برید مسوولیت هم هېڅ ډلې نه دی منلی.
