د بلوچستان ازادي غوښتونکې جبهې(بياېلاېف) ویلي، یوازې جولای میاشت کې یې پر پاکستاني ځواکونو شاوخوا۵۰ پوځي عملیات ترسره کړي او د پنځو تنو استخباراتي غړیو په ګډون یې، ۱۰۵ پاکستاني نظامیان وژلي او ۱۵ نور یې سخت ژوبل کړي دي.
دغې جبهې په خپاره کړي راپور کې ادعا کړې چې ترسره کړیو عملیاتو کې یې د پاکستاني ځواکونو ۱۵ پوځي موټر هم ویجاړ کړي او یو شمېر پرمختللي پوځي تجهیزات یې ترې نیولي دي.
په راپور کې د بلوڅ ازادۍ غوښتونکې جبهې مسوولانو ویلي، پر پاکستاني ځواکونو د جولای په پوځي عملیاتو کې تر ټولو خونړۍ برید د مستونګ ولسوالۍ په خادکوچه سیمه کې ترسره شو چې ۱۷ پاکستاني پوځیان په کې ووژل شول،۱۰ نور ټپیان شول او په پراخه توګه یې پوځي تجهیزات زیانمن شول.
د بياېلاېف راپور کې زیاته شوې: « دا بېلا بېل او مرګوني برېدونه د جبهې ځواکمنتیا، پوځي پلان جوړونه او تر هر ډول شرایطو لاندې د مبارزې وړتیا په ډاګه کوي.»
د بلوچستان ازادۍ لپاره دغې ولسوالې جبهې دا هم ویلي چې پوځي عملیات به یې په پوره ژمنتیا، دقت او نویو نوښتونو تر هغو پورې ادامه ولري چې د بلوچستان ازادۍ لپاره پیل کړې مبارزه بریالۍ نه شي.
د سیمه ییز وضعیت څارونکي بیا په بلوچستان کې د روان وضعیت اساسي لامل د پاکستان حکومت د ناسمو پالیسیو او حکومتولۍ دوام بولي او زیاتوي چې بلوڅانو له لسیزو راهیسې د خپلو حقونو ترلاسه کولو لپاره سوله ییزه مبارزه کړې، خو پر پاکستان واکمنو چارواکو یې یوازې غږونه غلي کړي او د غوښتنو له منلو یې سر غړولی.
د سیاسي چارو شنونکی عزیز معارج وايي: « په اوسنۍ جغرافیه کې د پاکستان پوځ او استخبارات مطلق کنټرول لري، خو خپله پاکستان بیا د غرب له خوا کنټروليږي. هلته دا هرڅه روان یوازې لوبې دي.»
که څه هم د پاکستان حکومت تل دغه جبهه د ترهګرو ډلو په نوم یاده کړې، خو بلوڅ سیاسي مشران او مخور بیا له بلوڅانو سره د پاکستان حکومت چلن د نابرابرۍ او جبر په اصولو ولاړ بولي.
دوی تل ویلي چې واکمنو چارواکو یې مشران ترور کړي او د دوی د ژوند بنسټیز حقونه یې ترې اخستي دي.
