د پاکستان پخواني لومړي وزیر عمران خان مېرمنې د دې هېواد له سترې محکمې د خپلې سزا ځنډولو غوښتنه کړې.
بشرا بيبي تازه د سترګې عمليات کړي او ويلي يې دي چې د ناسم روغتيايي وضعيت له امله يې له سترې محکمې د خپلې سزا ځنډولو غوښتنه کړې.
نوموړې دا مهال د پاکستان په اډیاله زندان کې بندي ده او د سترګې له عملیاتو وروسته یې روغتیايي حالت د اندېښنې وړ بلل شوی.
د ډان ورځپاڼې د راپور له مخې، د هغې مدافع وکیلانو ویلي، د بشرا بي بي عملیات د هغې کورنۍ له خبرولو پرته شوي او هڅه شوې چې اړوند طبي اسناد يې پټ وساتل شي.
د ډان ورځپاڼې په راپور کې زیاته شوې: « محکمې ته وړاندې شوې عریضه کې د هغې مدافع وکیلانو غوښتنه کړې چې د زندان او روغتون مسوولین محکمې ته را وغوښتل شي، د بشپړو طبي اسنادو د وړاندې کولو امر ورکړل شي او دغه راز بشرا بي بي دې ژر تر ژره د درملنې لپاره یوه ځانګړي روغتیايي مرکز ته ولېږدول شي.»
په عریضه کې راغلي، د درملنې پروسه په کافي شفافیت سره نه ده ترسره شوې او د هغې کورنۍ او وکیلانو ته پر وخت معلومات نه دي ورکړل شوي.
همداراز ویل شوي، د عمران خان مېرمن دوامدارې طبي پاملرنې ته اړتیا لري او په اوسني حالت کې یې په بند کې ساتل، د انساني اصولو خلاف عمل دي.
بله خوا، پخواني امریکايي ډېپلومات زلمي خلیلزاد بیا د عمران خان له کورنۍ او ملاتړو سره د پاکستان چلن ناعادلانه بللی.
هغه ویلي، عدالت او د سیاسي حقونو درناوی په هر هېواد کې د دوامدار ثبات لپاره ضروري دی او خبرداری يې ورکړی چې که دا مسایل له پامه وغورځول شي، نو د اسلاماباد ډېپلوماټیک اعتبار به اغېزمن شي.
خلیلزاد زیاته کړې: « له ایران سره د امریکا او اسراییلو د روانې کشالې په حل کې د پاکستان رول د ستاینې وړ دی، خو باید هېره نهکړو چې د دې هېواد حکومت د عمران خان له کورنۍ او ملاتړو سره چلن ناعادلانه دی او دا څه که ادامه پیدا کړي، نو د اسلام اباد ډېپلوماټیک اعتبار به سخت اغېزمن کړي.»
د چارو څارونکي بیا وایي، د پاکستان حکومت او پوځ د لوېدیځو هېوادونو او په ځانګړي ډول د امریکا خوشالولو لپاره داسې هڅې کوي، ترڅو د هغوی باور لاسته راوړي. دوی د عمران خان پر وړاندې د پاکستان پوځ او حکومت چلن له لوېدیځو سیاستونو سره تړلي بولي.
پخوانی ډېپلومات عزیز معارج وايي: « پاکستان د لوېديځ له خوا جوړ شوی هېواد دی، ترڅو د هغوی پروژې عملي کړي. د دې ډول هېوادونو چارواکي ځینې وخت فکر کوي چې خپلواکي لري او هر ډول پرېکړې کولی شي. عمران خان هم فکر کاوه چې د خپلواک هېواد مشر دی او هڅه یې وکړه چې له چین او روسیې سره اړیکې جوړې کړي. د ده دا کار د لوېديځ د پالیسیو خلاف و، ځکه یې د ده حکومت ړنګ او دی یې زندان ته واچوه، ترڅو نور خلک پند واخلي او ده ته سزا ورکړل شي.»
عمران خان او مېرمن یې د فساد په قضیو کې تورن دي او هر یو تازه پر ۱۷ – ۱۷ کاله بند هم محکوم شوي.
دا څرګندونې په داسې حال کې کېږي چې پاکستان په وروستیو کې د سیمهییزو او نړیوالو قدرتونو ترمنځ د تاوتریخوالي کمولو په برخه کې فعال رول لوبولی، خو په کور دننه د سیاسي مخالفینو او په ځانګړي ډول د عمران خان چلن له امله تر نیوکو لاندې دی.
