د ۲۰۲۳ زېږدیز کال اکټوبر ۷ راهیسې غزه د اسراییلي ځواکونو تر هوايي او ځمکنيو بریدونو لاندې ده. په کنډوالو شویو کورونو کې تر لنډمهاله سرپناه لاندې فلسطیني وګړو له سختې لوږې او بمباریو د ځان ژغورنې لپاره لا هېڅ مرستندوی نه دی موندلای.
د راپورونو پر بنسټ، ګڼو هېوادونو او مرستندویه بشري سازمانونو د اسراییلو له خوا په غزه کې د لوږې رامنځته کولو غیر انساني جنګي تګلاره غندلې او دغې تړانګې ته یې د سمدستي مرستو پر رسولو ټینګار کړی.
خو د نړيوالو سازمانونو د ادعا له مخې، واشنګټن او تل ابیب په منځنۍ ختیځ کې د خپلو ستراتیژیکو اهدافو د تعقيب لپاره په دې اړه د نړیوالو غوښتنې بابېزه ګڼلې دي.
تازه امریکايي سناتور برني سنډرز د غزې په اړه د امریکا او اسراییلو پرېکړې او جنګي موقف په سختو ټکو غندلی او هلته يې د جګړې له امله واشنګټن او اتلابیب پر ټولو وژنه تورن کړي او د بشري حقونو دروغجن مدعیان یې ګڼلي دي.
سنډرز زیاته کړې: «۶۰ سلنه امریکایان د فلسطینیانو پر وړاندې د نتنیاهو د وحشیانه جګړې مخالفت کوي. موږ له ډیموکراټ استازو سره پر ګډه اسراییلو ته د دې جګړې مالي ملاتړ درولو هڅې پیل کړې. آیا یو عام جمهوري پال وګړی غواړي چې میلیاردونه ډالر دې د ماشومانو د وږي ساتلو لپاره وکارول شي؟»
د غزې روغتیا وزارت ویلي، د اسراییلي ځواکونو په مرګونو بمباریو کې د څه باندې۶۰ زرو کسانو شهیدانو ترڅنګ د پراخې لوږې څپو هم هلته نږدې ۲۰۰ تنو د لوږې له امله ژوند له لاسه روکړی چې له نیمايي زیات یې ماشومان دي.
د دې ترڅنګ، د ملګرو ملتونو سرمنشي د خوړو خوندیتوب لپاره د څار ادارې د موندنو پربنسټ ویلي، اوس مهال په غزه کې د لوږې بشري ناورین ته سمدستي اوربند او د بشري مرستو رسول حیاتي دي.
انټونیو ګوټېریش زیاته کړې، د اسراییلو له لوري په غزه کې په قصدي توګه د لوږې رامنځته کول نه زغموونکی بشري جنایت دی.
د ملګرو ملتونو سرمنشي دغه راز ویلي: « په غزه کې د لوږې رامنځته شوی وضعیت طبیعي آفت نه دی بلکې د انسان له خوا تحمیل شوی بشري جنایت دی چې نړیوالو یې باید له وړاندې مخنیوی کړی وای.»
خو اسراییلي چارواکو بیا په غزه کې د لوږې مرګونی وضعیت ردوي او د ټولې غزې د کنټرول لپاره د نویو پوځي عملیاتو له پلانولو خبر ورکوي.
د اسراییلو ۱۲ چینل په نوم ټلوېزیون د دې هېواد لومړي وزیر بینیامین نتنیاهو دفتر کې د سرچینې له قوله راپور ورکړی چې نتنیاهو د امنیتي چارواکو سره د ټولې غزې نیولو لپاره د پلان جوړولو ځانګړې ناسته کړې.
د ۱۲ چینل د راپور یوه برخه کې راغلي: « څنګه کولی شو د جګړې درې مهم اهداف ترلاسه کړو؟ د دوښمن ماتول، د خپلو برمته وګړو خوشې کول او دا چې څنګه ډاډ ترلاسه کړو، غزه به نوره د اسراییلو خاورې ته ګواښ نه وي؟»
د خوړو خوندیتوب لپاره د څار نړیوالې ادارې (ای.پي.سي) د راپور پر بنسټ، اوس مهال په غزه کې شاوخوا ۷۱ ماشومان او ۱۷ زره ښځې د لوږې له امله د مرګ له جدي خطر سره مخ دي چې بېړنۍ تغذیې ته اړتیا لري.
