د فلسطيني ادارې پخوانی لومړی وزیر او د فلسطین د اسلامي غورځنګ سیاسي دفتر مشر داکټر اسماعیل هنیه د جولای په ۳۱مه د ایران د نوي ولسمشر د لوړې مراسمو کې له ګډون څو ساعته وروسته په خپل استونګنځي کې له یوه ساتونکي سره ترور شو.
پر اسماعیل هنیه د برېد مسوولیت چانه دی اخیستی او نه هم تراوسه پورې د ایران حکومت پلټنې بشپړې شوي خو د افغانستان په شمول ګڼو هېوادونو دا برېد غندلی دی.
حماس غورځنګ په یوه خبرپاڼه کې دا برېد بزدلانه عمل بللی د ی او د غچ اخیستلو خبرداری یې ورکړی دی.
د خبرپاڼې یوه برخه:« د حماس اسلامي مقاومت غورځنګ د فلسطین او عربو ملت، اسلامي نړۍ او ټولو ازادي غوښتونکو سره غمرازي کوي. د شهید مجاهد اسماعیل هنیه د ایران نوي ولسمشر د لوړې په مراسمو کې له ګډون وروسته په تهران کې په خپل کور کې د صهیونیسټانو په برید کې مړ شو. موږ به خدای او هغه ته ور ستانه شو،جهاد فتح یا شهادت دی.»
دحماس غورځنګ د هنیه د شهادت خبر د غزې په مسجدونو کې اعلان کړ.
د اسماعیل هنیه د مړینې خبر له اورېدو وروسته د هغه اینګور په یوه ویډیويي پیام کې وویل:« له سترګو اوښکې بهیږي او زړونه غمجن دي. زموږ پلاره! ستا پر جدایي غمجن یو.»
۶۲ کلن اسماعیل هنیه، د ایران د نوي ولسمشر د لوړې په مراسمو کې د ګډون لپاره تهران ته تللی و او ایراني ولسمشر مسعود پزشکیان سره یې هم ولیدل.
د ایران نوي ولسمشر لومړي مرستیال د اسماعیل هنیه ترور دولتي ترهګري بللې او پر نړیواله ټولنه یې نیوکه کړې چې د صهیونیسټانو په جنایتونو چوپ دي.
ورته مهال د ایران د بهرنیو چارو وزارت ویلي، دغه ډول بریېد به د فلسطین او ایران اړیکې لا پياوړې کړي.
دغه وزارت زیاته کړې:« تهران کې د فلسطین د اسلامي مقاومت غورځنګ حماس د سیاسي دفتر مشر اسماعیل هنیه شهادت د فلسطین ستر او ویاړلی ملت ته، د حماس غورځنګ او د فلسطین ټولو مقاومتي ډلو ته مبارکي وایم. د ایران د اسلامي جمهوریت او د فلسطین ترمنځ ژورې او نه ماتیدونکې اړیکې به دا غورځنګ لا پیاوړی کړي.»
د امریکا د بهرنیو چارو وزارت په ۲۰۱۸ کال اسماعیل هنیه د ترهګرو په نوملړ کې شامل کړ. تهران کې پر نوموړي له برېد وروسته د سپينې ماڼۍ یوه چارواکي امریکايي رسنیو ته ویلي، پر هنیه له برېد خبر دي.
سپینه ماڼۍ وايي:؛« په تهران کې د حماس ډلې د سیاسي دفتر د مشر هنیه د وژل کېدو له پېښې خبر یوو.»
د فلسطین ولسمشر محمود عباس د حماس غورځنګ سیاسي دفتر د مشر وژنه غندلې او دا یې یو بزدلانه عمل بللی دی.
د حوثیانو انصار الله غورځنګ بیا دا ترهګریز عمل بللی او ویلي یې دي چې دا یو جنایت او د جنګ له اصولو او قوانینو سرغړونه ده.
۶۲ کلن اسماعیل هنیه څوک و؟
- هنیه په ۱۹۶۳ ز کال کې د فلسطین په غزې تړانګه کې نړۍ ته راغی.
- د غزې په اسلامي پوهنتون کې یې زده کړې وکړې.
- د ۲۰۰۶ کال کې د فلسطين ټاکنو کې بريالی او د فلسطين لسم لومړی وزیر شو او د ۲۰۰۷ کال د جون تر ۱۴ پورې د فلسطیني ادارې لومړی وزیر وه.
د اسماعیل هنیه کاري تجربې او فعالیتونه
د غزې د اسلامي پوهنتون د اداري بورډ پخوانی منشي
د غزې د اسلامي پوهنتون د اداري چارو پخوانی مشر
د غزې د اسلامي پوهنتون پخوانی اکاډمیک مشر
د غزې د اسلامي پوهنتون پخوانی غړی
د حماس غورځنګ د عالي کمیټې غړی
د غزې د اسلامي جمعیت د بورډ پخوانی غړی
او د لسو کلونو لپاره د غزې د اسلامي جمعیت کلب مشر پاتې شوی دی
