د امریکا ولسمشر یو ځل بیا خبر ورکړی چې له ایراني سره د خبرو اترو یو نوی پړاو پیلوي. ډونالډ ټرمپ ویلي، له ایران سره د خبرو دا پړاو به د دوشنبې په ورځ پیل شي.
د ټرمپ له لوري دغه اعلان وروسته له هغې شوی چې نوموړي تېره شپه د ایران پر ضد د احتمالي بریدونو لغوه کېدو خبر ورکړ.
ټرمپ د واشنګټن او تهران ترمنځ د هرمز تنګي په اړه د هوکړې موجودیت ته په اشارې د ایران اټومي پروګرام په تړاو هم د یوې احتمالي هوکړې ترلاسه کېدو ډاډ ورکړی.
د امریکا ولسمشر وړاندې ویلي: « له ایران سره به د دوشنبې په ورځ د خبرو اترو یو نوی پړاو پیل شي. هیله شته چې دا خبرې یوې ښې پایلې ته ورسېږي. که څه هم هغوی هم خبرې کوي، خو له دغو خبرو سره د ډېرو ژوند وژغورل شي. اوس دا فرصت شته چې موږ یوې هوکړې ته ورسیږو.»
د امریکا ولسمشر د یکشنبې په ورځ بیا خبریالانو ته ویلي و چې ایران نهغواړي چې د امریکا له خوا پرې بریدونه وشي.
ډونالډ ټرمپ تېره ورځ خبریالانو ته ویلي، ایران له ډېپلوماټیکو لارو د اختلافونو حل ته لېوالتیا لري او نه غواړي له دې زیات بریدونه پرې وشي.
ډونالډ ټرمپ په دې اړه ویلي: « ښکاره ده چې هغوی نه غواړي برید پرې وشي. هغوی د برید له کچې خبر وو، ځکه د هغه چمتووالی یې لیدلی و. اوس موږ له هغوی سره خبرې کوو او دا خبرې به سبا له غرمې وروسته پیل شي.»
په ورته مهال، د ایران ولسمشر د هغو هڅو بیا غوښتنه کړې چې امریکا دې د اسلاماباد تفاهملیک ته د ژمن پاتې کېدو لپاره وهڅول شي.
مسعود پزشکیان په ضمني ډول له منځګړو غوښتي چې ډونالډ ټرمپ دې د یاد تفاهملیک د مادو رعایتولو لپاره وهڅوي.
پزشکیان دغه راز ویلي: « هغه هوکړه چې لاسلیک شوې، د ټولو غاړو یوه هوښیارانه پرېکړه وه او اوس باید ټولې غاړې ورته پام هم وکړي. زه باور لرم چې دا هوکړه لیک به زموږ د راتلوونکو بهرنیو اړیکو اساس جوړ کړي. موږ باید په ګډه مقابل اړخ وهڅوو چې څو هغوی هم دې هوکړه لیک ته ژمن پاتې شي. زه په ډاډ ویلی شم چې د دې هوکړې عملي کېدل د ټولې سیمې لپاره مثبتې پایلې لرلی شي.»
په ورته وخت کې د ایران بهرنیو چارو وزیر عباس عراقچي ویلي چې د هرمز تنګي په اړه له عمان سره خبرې د وروستي پړاو پر لور روانې دي.
د ایران د بهرنیو چارو وزارت ویاند هم ویلي چې د مسقط او تهران ترمنځ د هرمز تنګي په اړه د یوه نوي دهلېز په اړه تفاهم شوی چې نه شمالي مسیر دی او نه هم جنوبي مسیر؛ خو هغه ټینګار کړی چې دغه تفاهم د هرمز تنګي له خلاصولو یا تړلو سره اړه نه لري.
د نړیوالو چارو شنونکی واحد فقیري وايي: « د ایران او امریکا په جنجال کې ټرمپ له مذاکراتو او خبرو بله چاره نه لري. د امریکا په داخل کې ټاکنې را روانې دي او له دې امله پر ټرمپ فشار ډېر زیات دی. همدارنګه هلته هم اقتصادي وضعیت خراب شوی او قېمتونه لوړ شوي دي.»
پخوانی ډېپلوماټ عزیز معارج وايي: « ایران او امریکا همدا اوس هم جګړه کې دي. جګړه بېلابېل تکتیکونه لري؛ کله په کې وقفه راځي او خبرو ته سره کېني او بیا بېرته تودېږي، ترڅو له یوبل څخه د فشار له لارې امتیازونه واخلي. همدارنګه له تبلیغاتي او استخباراتي تکتیکونو هم کار اخستل کېږي.»
تر دې وړاندې د امریکا ولسمشر ویلي وو چې ورته ویل شوي د یوې عمومي هوکړې پر چوکاټ موافقه شوې؛ داسې یوه هوکړه چې په کې د هرمز تنګي سملاسي، بشپړ او هر اړخیز بیا خلاصول شامل دي.
په ورته مهال، د ایران، سعودي عربستان، پاکستان، قطر او اردن بهرنیو چارو وزیرانو ترمنځ یو شمېر سلا مشورې هم روانې دي چې ښکاري د تهران او واشنګټن ترمنځ د خبرو اترو پر محور راڅرخي.
