د ایران او امریکا ترمنځ روانې جګړې د منځني ختیځ امنیت، د نړیوالې انرژۍ وضعیت او سیاست له ژورو بحرانونو سره مخ کړي.
دې جګړې له اقتصادي کړکېچ سربېره، د زبرځواکو هېوادونو ترمنځ داسې سیالي هم رامنځته کړې چې په سیمه ییزو کړکېچونو کې د یو بل سیمه ییز متحدین او ملاتړي وځپي او خپله نفوذي جغرافیه پراخه کړي.
د واشنګټن او تهران ترمنځ د تفاهم لیک لاسلیک کېدو نه یوازې جګړه و نه دروله بلکې د سیاسي تفاهم هغه باور یې هم له منځه یووړ چې ښکېل لوري یې له جګړې پرته د ستونزو حل ته چمتو کول.
تازه د امریکا متحده ایالتونو ویلي چې تر هغو به پر ایران بریدونه ونه دروي چې د دې هېواد اټومي تأسیسات یې له منځه نه وي وړي. د امریکا ولسمشر دغه راز ویلي، اجازه نه ورکوي چې ایران اټومي وسلې جوړې کړي.
ډونالډ ټرمپ زیاته کړې: « څه چې موږ یې اوس ترسره کوو، هغه دا دي چې موږ د هغوی هر هغه چانس له منځه وړو چې دوی یې د اټومي توغندیو جوړولو لپاره په پام کې لري. وګورئ! له څه باندې یوې اوونۍ راهیسې مو دا هڅه شنډه کړه. ښايي موږ یې مخنیوی کړی وي، خو زه نه غواړم د ښايي کلمه هم ورته وکاروم.»
په ورته مهال، د امریکا او ایران ترمنځ پوځي تقابل تهران اړکړی چې د هرمز تنګي په ټرانزیټي لاره د خپل حاکمیت دریځ نور هم پیاوړي کړي.
د دې هېواد انقلابي ګار(سپاه پاسداران) چې له امریکا سره د جګړې اصلي لوری دی، په تازه خبرداردي کې یو ځل بیا ګواښ کړی چې د متحده ایالتونو له خوا د بریدونو په صورت کې به دا تنګی د هر ډول کارېدنې لپاره تړلی وساتي.
سپاه ویلي:« تر هغو چې په سیمه کې د امریکا تېری دوام وکړي، د هرمز تنګی به خوندي نه وي. په دې لاره به نه پیټرو کیمیاوي محصولات او نه به د تېلو او ګاز یو څاڅکۍخوندي تېر شي.»
د ایران دې ځانګړي پوځي ځواک دا هم ویلي چې په هرمز تنګي کې یې دوې سوداګریزې بېړۍ وروسته له هغې له حرکت وغورځولې چې په خبره یې د ایراني سمندري ځواکونو خبرداری یې له پامه وغورځاوه.
شنونکي د ایران او امریکا جګړه په سیمه کې سیاسي او اقتصادي وضعیت ته یوه ستر ننګونه بولي. دوی پر تهران د واشنګټن پوځي فشار د متحده ایالاتو د هغو اوږد مهالو پالیسو برخه ګڼي چې دې هېواد یې د عملي کولو لپاره د لسیزو راهیسې انتظار کړی.
د سیاسي چارو شنونکی عزیز معارج وايي: « امریکا غواړي ایران په بشپړ ډول په خپل کنټرول کې وساتي او هلته داسې حکومت جوړ کړي چې د امریکا لپاره کار وکړي. دا جګړه به تر هغو ادامه ولري چې ایران دا شرایط ومني. مذاکرات او خبرې یوازې د فرصت ورکولو لپاره دي او دا چې تعامل وشي. خو که تعامل نه کېږي، جګړه به هم ادامه ولري.»
د راپورونو پر بنسټ، امریکا پر ایران د بریدونو او جګړې زیاتولو لپاره لسګونه جنګي او د تېلو لېږدونکې الوتکې منځني ختیځ ته استولې دي او ایران هم د ځوابي اقداماتو لپاره د بشپړ چمتوالي خبر ورکړی.
د دواړو هېوادونو مخ پر زیاتېدونکو ترینګلتیاوو په نړۍ کې د تیلو او ګاز بیې په بې ساري ډول لوړې کړې او هېوادونه یې له ګڼو اقتصادي ننګونو سره مخ کړي دي.
