د منځګړوهېوادونو ګډې خبرپاڼې یوه برخه:« د تفاهملیک پر بنسټ، ګډونوالو د یوې لوړې کچې کمېټې پر جوړولو موافقه کړې، چې د منځګړیتوب پر بهیر به سیاسي څارنه کوي. اصلي مذاکره کوونکي به په منظم ډول دغې کمېټې ته راپور ورکوي او د هغو کاري ډلو مشري به کوي چې د اټومي موضوع، بندیزونو، څارنې او د شخړو د حل پر چارو تمرکز لري، څو د تفاهملیک اغېزمن پلي کېدل یقیني شي.»
په سویس کې د دې مذاکراتو د پيلولو لپاره د امریکا ولسمشر مرستیال جي ډي وېنس او د ایران بهرنیو چارو وزیر عباس عراقچي او د پارلمان رییس محمد باقر قالیباف هم ګډون درلود چې د خپلو مطرح کړیو غوښتنو پر بنسټ يې د مذاکراتو پيلامه مثبته بللې ده .
د امریکا د ولسمشر مرستیال او د دې هېواد د مذاکراتو مشر جي ډي وېنس ویلي ، که ایران له اټومي پروګرام او په سیمه کې د وسله والو ډلو له ملاتړ لاس واخلي، واشنګټن به له تهران سره رغنده اړیکې وپالي.
هغه زیاته کړې:« ولسمشر موږ ته دنده راکړې چې نوې پاڼه پرانیزو ، د ایران له خلکو سره خپلې اړیکې بدلې کړو او هغوی ته دوستۍ او همکارۍ لاس ورکړو ، خو پیغام مې د ایران خلکو ته دادی چې کچېرې ستاسو مشرتابه د سیمې له بې ثباتۍ او اټومي وسلو څخه لاس پر سر شي.»
په ورته مهال د ایران بهرنیو چارو وزیر عباس عراقچي چې د منځګړو هېوادونو له هڅو یې ستاینه کړې د مذاکراتو له لارې د هعو عملي شویو موافقو څخه هر کلی کړی چې د ایران د بندرونو کلابندي ورسره ختمه شوې او د کنګل شویو شتمنیو یوه برخه یې ازاده شوې ده .
نوموړي پر خپله اېکس پاڼه کاږلي ، ایران به د لوبو او سیاست دواړو په برخه کې هغه ګامونه واخلي چې هېواد ته یې سترې لاسته راوړنې وبلل شي.
عراقچي څرګنده کړې:« د فوټبال له ډګره، د مذاکراتو تر مېز او د جګړې تر سنګر پورې، موږ ایرانیان چې هر ګام اخلو، هغه د یوې لویې مبارزې برخه ده. زموږ د ګران ولس د عزت، وقار او کرامت د دفاع په موخه دی.»
د ایران او امریکا په مذاکراتو کې د اختلافاتو اساسي مسایل د ایران اټومي پروګرام ، د هرمز تنګي راتلونکی برخلیک ، د ایران سیمه ییزو ملاتړو ډلو فعالیتونه او د ایران په سوداګرۍ د واشنګټن لګول شوي بندیزونه ګڼل کېږي چې لا یې هم د دواړو لوریو تر منځ د حل په برخه کې اختلافونه ژور دي.
