د اسلام پیغمبر ته د سپکاوي په تور تورنه پاکستانۍ اسیه بي بي غواړي جرمني ته ولاړه شي خو قبولي ته یې اړتیا ده.
په ورته وخت کې د اسیه بي بي مدافع وکیل وايي، د هغې نوره کورنۍ نه غواړي چې له پاکستان و وځي.
د اسلام پیغمبر ته د سپکاوي په تور تورنه آسیه بي بي جرمني کې د اوسیدو اسنادو ته اړتیا لري.
د اسیه بي بي وکیل چې په فرانکفورت کې دی وايي له جرمني چارواکو سره یې په دې تړاو خبرې روانې دي.
هغه وايي آسیه بي بي له زندان خوشې شوې خو له هیواده بهر وتلو لپاره قوي اسنادو ته اړتیا لري.
د اسیه بي بي مدافع وکیل سیف الملوک وویل، (( دا ډيره ساده ده، کله چې د پاکستان اساسي قانون و ویل چې قضايي څانګو ته باید درناوی وشي، بیا نو د نړۍ هیڅ قوت د دې کار مخه نشي نیولی، قضايي قوې هغه خوشې کړې ده او اوس د هغې خوښه ده چې په اسلام اباد کې پاتې کیږي او که له هیواده بهر ځي خو وروستیو لاریونونو یې له پاکستانه وتل سخت کړي دي.))
سیف الملوک وايي، اسیه بې بې کولای شول په یوې ویزه جرمني ته ولاړه شي خو اوس ځینو ګوندونو غبرګونونه ښودلي او د پاکستان حکومت هغه په یوې ویزې له هیواده نشي ویستلی.
هغه وايي، جرمني باید د اوسیدو او قبولۍ ټول اسناد ورکړي.
اخوا یو شمیر راپورونه وايي، چې د اسیه بي بي څښتن بله میرمن هم لري او د هغوی کورنۍ نه غواړي چې له پاکستان و وځي.
د نړۍ یو شمیر نورو هیوادونو هم اسیه بي بي ته د پناه ورکولو غوښتنه کړې ده.
اسیه بي بي په ۲۰۱۰ کال کې اسلام ته د سپکاوي په تور په اعدام محکومه شوې وه چې څو اونۍ وړاندې خوشې شوه.
