۱۱ ورځې کیږي چې د اسرائیلو لخوا پر غزې تړانګه سخت خونړي او ویجاړونکي بریدونه او بمبارۍ دوام لري چې زرګونه فلسطینیانو ته یې مرګ ژوبله اړولې .
دغه بریدونه اسرائیلي پوځ د لومړي وزیر په امر پيل کړي او دغه راز په غزې تړانګه اوبه، خوراکي توکي او برېښنا یې بنده کړې او دا پرېکړه جنګي جنایت او د بشري حقونو نقض بلل کیږي.
د اسپانیا ټولنیزو حقونو وزیرې ایوان بیلارا ویلي، د جرمونو نړیوله محکمه دې څېړنې وکړي او د اسرائیلو لومړی وزیر دې محاکمه کړي.
بیلارا زیاته کړې:« نن موږ غواړو دا غږ پورته کړو او وغندو چې اسرائیلو غزې تړانګه کې پلان شوې نسل وژنه پیل کړې، سلګونه زرګونه خلک یې بې برېښنا، خوړو او اوبو پریښي او ملکي ځایونه بمبار کوي چې دا ټول یوه ګډه سزا ده. دوی نړیوال قانونو مات کړی او دا هر څه یې جنګي جرمونه دي. امریکا او اروپايي ټولنه اسرائیلو نور هم هڅوي چې دا د بشر حقونو نقض دی. په غزه کې د اسرائیلو جرمونه د منلو وړ نه دي، نو موږ د اسپانیا له دولت او د جرمونو له نړیوالې محکمې غواړو چې دا جرمونه وڅیړي او نتنیاهو محکمې ته راکش کړي.»
بیلارا دا څرګندونې داسې مهال کوي، چې تازه د امریکا ولسمشر جوبایډن ویلي، د اسرائیلو ملاتړ په موخه دغه هېواد ته ځي او د حماس ډلې له منځه وړلو پریکړې ملاتړ یې کړی دی.
بایډن زیاته کړې:« د چهارشنبې په ورځ به زه اسرائیلو ته سفر وکړم ترڅو د حماس د وحشیانه ترهګریزو بریدونو پر وړاندې خپل پیوستون اعلان په وړاندې یې ودریږم. له اسرائیلو به اردن ته سفر وکړم له مشرانو سره به وګورم او سختو بشري اړتیاوو ته د رسیدګۍ ترڅنګ به دا روښانه کړم چې حماس د فلسطین د خپلواکۍ حق ته غاړه نه ایږدي.»
په ورته وخت کې اسرائیلو بیا ویلي، غزې تړانګه کې ځمکني عملیات ترسره کوي او د دې لپاره یې ۳۰۰ زره ځواکونه پولو کې ځای پر ځای کړي دي.
د اسرائیلو د دې خبر غبرګون کې بیا د ایران د بهرنیو چارو وزیر امیر عبداللهیان ویلي، اسرائیلو ته به اجازه ورنه کړل شي چې غزې ته ننوځي او ګواښ یې کړی که د غزې دفاع ونه شي نو جګړه به نورو سیمو ته هم وغځیږي.
هغه زیاته کړې:« له حزب الله ډلې سره د ټولو احتمالي پریکړو او سناریوګانو واک شته. په طبیعي ډول د مقاومت مشران به صهیونیست رژیم ته اجازه ورنه کړي چې په غزه کې کوم اقدام وکړي او کله چې د غزې په اړه ډاډمن شي نو د مقاومت لپاره به نورو سیمو ته لاړ شي. که نن د غزې دفاع ونه کړو، سبا به دې اړشو چې د دې بمونو پر وړاندې خپل هېواد کې د ماشومانو دفاع وکړو.»
دا چې نورو هېوادونو ته د جګړې د غځیدو خطرونه زیات شوي، کریملین ماڼۍ بیا ویلي، د روسیې ولسمشر ولادیمیر پوتین د فلسطین، ایران او اسرائیلو د ولسمشرانو په ګډون د یو شمیر نورو هېوادونو له مشرانو سره تلیفوني خبرې کړې او د اوربند غوښتنه یې کړې.
