اسانه درملنه، د روغتیا په برخه کې د اسانتیاوو هغه نوی اپلکېشن دی چې د ناروغ او ډاکټر ترمنځ په اسانه همغږي او په کم وخت کې د درملنې زمینه برابرولی شي. دا اپلکېشن تازه فعاله شوی او خلک په ډېره اسانۍ او وړیا ډول له ډاکټرانو سره نښلوي.
د اپلکېشن د جوړوونکي ټیم غړی عبدالله توطاخېل وايي: « دا اپلکېشن د دې لپاره جوړ شوی چې د روغتیا په برخه کې لاسرسی اسانه شي. د دې کار لپاره ډېر معلومات راټول شوي او څه کم یوه کال په اوږدو کې دا اپلکېشن جوړ شو چې اسانه درمنله یا درمان آسان په نوم د لاسرسي وړ دی.»
په دې اپلکېشن کې د ټولو برخو هغه متخصص ډاکټران ځای پرځای شوي چې د هېواد په کچه د غوره پوهنتونونو اسناد او په غوره او باوري روغتونو کې دندې لري. جوړوونکي یې وایي، د عامې روغتیا وزارت د پالیسۍ له مخې یې دا اپلکېشن جوړ کړی او ټولو اصولو ته په کې پاملرنه شوې.
عبدالله توطاخېل په دې اړه وايي: « هغه څوک چې درملنې یا درملو ته اړتیا لري، هغه کولی شي په دې اپلکېشن کې د درملو، د درمل جوونکي شرکت او هېواد په اړه معلومات ترلاسه او با کیفیته درمل وپېري.»
دغه اپلکېشن چې د ګډونوالو ډاکټرانو ټول مشخصات په کې موجود دي، د بېړنۍ اړتیا پر مهال کاروونکي ته د نقشې پر بنسټ زمینه برابروي چې تر ټولو نږدې روغتیایي مرکز یا ډاکټر ته لاسرسی ولري. دوی وایي، په لابراتوارونو کې یې د ناروغانو د وینې د ټیسټونو لپاره دا زمینه هم برابره کړې چې له اړونده ډاکټر سره تر اړیکې وروسته به روغتیاپال د وینې اخیستو لپاره ګومارل شوي کسان د ناروغ تر کوره لیږي.
د اپلکېشن د جوړوونکي ټیم غړی عبدالله توطاخېل وايي: « په دې اپلکېشن کې د هېواد بېلابېل درملتونونه راجسټر شوي او نور به هم راجسټر شي. هېوادوال کولی شي د خپل طبي نسخې په لېږلو سره باکیفیته او په مناسب بیه درمل ترلاسه کړي. په دې اپلکېشن کې تر کوره د درملو رسولو خدمات هم شته دي.»
د دې اپلکېشن جوړول په داسې حال کې دي چې په دې ډول نور اپلکېشنونه هم په هېواد کې فعال دي چې ناروغانو ته په انلاین ډول ډاکټران مشورې ورکوي او ان ځینې مخابراتي شبکې خپلو پېرېدونکو ته د روغتیایي مشورو پیغامونه هم استوي چې ډېری افغانان له دې اسانې لارې د خپلې روغتیا په اړه له ډاکټرانو مشورې اخلي، خو د دې اپلکېشن ځانګړتیا بیا دا ده چې کاروونکي یې له ډاکټرانو سره په وړیا ډول اړیکه نیولی شي.
