افغان سوداګر: د تورخم او سپین بولدک لارو تړل کېدو اغېزمن کړي یو 

یو شمېر افغان سوداګر وايي، د دواړو لارو له بندیدو سره یې تازه میوې په خرابېدو دي او درانه مالي زیانونه ور اوښتي دي.

دوی  پاکستان له افغانانو سره په دوه مخي چلن تورنوي  او وايي، کراچۍ او نورو بندرونو کې یې د افغان سوداګرو مالونه درولي،چې د خرابیدو په حال کې دي.

افغان سوداګر محمد نبي  وايي:« پاکستان له زموږ سره دوه مخی سیاست کوي. د میوو په وخت کي لارې بند وي او ترڅنګ یې زموږ عامو خلګو ته ستونزې جوړوي،چې ناروغان لري،خو هېڅکله پاکستان له خپل دوه مخي سیاست څخه تېر نه شو.»

سوداګرۍ خونه هم مني،چي پاکستان تل د افغانانو پر وړاندې ستونزې رامنځته  کړي او سوداګرو ته یې درانه مالي زیانونه اړولي دي.

د تورخم دروازې سربېره د سپین بولدک تړل کېدو هم سوداګري اغیزمنه کړې ده.

د کندهار د سوداګرو ټولنې مشر نانی اغا وايي:«  زموږ سړکونه له انارو څخه ډک دي او موږ د حکومتونو په سیاستونو نه پوهېږو،چي ولي  له  زموږ سره داسي کوې؟ ستونزه د پاکستان حکومت جوړه کړې،چي دروازه یې بنده کړې.»

په همدې حال کې د افغانستان اسلامي امارت د مطبوعاتو غړی بلال کریمي وايي،په ستونزو خبر دي او ډېر ژر به له پاکستاني لوري سره د شته ستونزو حل پیدا کړي.

کریمي زیاتوي:« موږ له دواړو ستونزو خبر یو،هڅه کوو،ترڅو له پاکستاني لوري سره د ستونزو د حل په موخه خبري وکړو او د افغانانو ستونزه حل شي.»

په سپین بولدک او تورخم کې دا مهال ګڼ شمیر افغانان انتظار باسي،چې پښتونخوا او پاکستان ته واوړي،خو یادې لارې د پاکستاني ځواکونو له خوا تړل شوي دي.