بلخ ولایت کې د کورنیو تولیداتو د ودې او بهرنیو توکو د وارداتو کمولو په موخه، یو بل ګام هم پورته شو.
د هرې نوې کارخونې فعالیت یوازې د توکو تولید نه بلکې د کار، عاید او اقتصادي ځان بسیاینې نوې دروازې هم پرانیزي.
د بلخ په صنعتي پارکونو کې د پخلنځي لوښو د تولید یوه نوې کارخونه فعاله شوه چې په دوه شفټونو کې شاوخوا دوه زره بخاري او ساده دېګونه او ورته نور لوښي تولیدوي.
د کارخونې مسوولین وايي، ۳۰ میلیونه افغانۍ پانګونه یې کړې او ورسره یې ۱۰۰ تنو ته کاري فرصتونه هم برابر کړي.
د کارخونې مسوول، ضیاخان سادات وايي: « موږ اوس هره ورځ پنځه ټنه او هره شپه هم پنځه ټنه تولید لرو. له موږ سره ۸۰ تنه په کار بوخت دي. موږ په دې کارخونه کې له ۳۰ میلیون څخه زیاتې افغانۍ پانګونه کړې او اراده لرو چې خپل کار نور هم پراخ کړو.»
هغه کسان چې دلته د کار زمینه ورته برابره شوې، خوښ دي، خو له نورو پانګوالو هم غواړي چې په تولیدي برخو کې پانګونه وکړي، ترڅو له یوې خوا د هېواد اقتصادي بنسټونه پیاوړي او له بلې خوا ځوانانو ته د کار زمینه برابره شي.
کارګر احمد رامش وايي: « ډېر خوشاله یم چې دلته کار کوم او عاید ترلاسه کوم. له نورو سوداګرو هم هیله لرو چې دا ډول کارخونې جوړې کړي، ځوانانو ته د کار زمینه برابره کړي او پردیو وطنونو ته یې له تګ وژغوري.»
کارګر احمد رشاد وايي: « دا چې بل ځای کار پسې ځو، ښه ده چې خپل وطن کې کار وکړو. له نورو پانګوالو هیله کوم چې خپل وطن کې پانګونه وکړي، ترڅو ځوانان د کار لپاره بل ځای لاړ نه شي.»
په ورته مهال، د بلخ صنعت او سوداګرۍ ریاست مسوولین وایي، په هېواد کې د ورته تولیدي کارخونو پراختیا کولی شي د وارداتي توکو کچه راټیټه او د کورنیو تولیداتو بازار لا پیاوړی کړي.
دوی همداراز ډاډ ورکوي چې د صنعت د ودې او پراختیا، د پانګوالو د ملاتړ او د هغوی د ستونزو د حل په برخه کې به خپلو هڅو ته دوام ورکړي.
د بلخ سوداګرۍ او پانګونې خونې رییس، محمد ابراهیم غضنفر وایي: « خصوصي سکټور له مالیاتي، امنیتي، صادراتي او وارداتي پلوه لا ډېر ملاتړ ته اړتیا او غوښتنه لري. همدارنګه مالي ملاتړ، د ځمکو وېش او ثابته انرژي هغه څه دي چې خصوصي سکټور د خپلې ودې لپاره ورته اړتیا لري.»
د بلخ صنعت او سوداګرۍ ریاست مرستیال، نصیر احمد نیازی وايي: « په بلخ ولایت کې له ۴۰ ډېرې د دېګونوجوړولو فابریکې شته او زموږ د معلوماتو له مخې یې صادرات هم نسبت نورو برخو ته ډېر دي. اسلامي امارت د دوی ملاتړ کړی او ملاتړ ته به ادامه ورکوي.»
د معلوماتو له مخې، افغانستان د بخار دیګونو له اړخه ځان بسیاینې ته رسېدلی او تېر کال یې خپل دغه محصول اوزبېکستان او یوشمېر نورو اسیایي هېوادونه ته صادر کړی هم دی. تمه شته چې سږکال به هم صادر شي.
