جېش محمد ډله په افغانستان کې دداعش په نوم فعالیت کوي.
ملګرو ملتونو د جېش محمد ډلې مشر مسعود اظهر د نړیوالو ترهګرو په لېست کې شامل کړ.
طالبان وایي، دغې ډلې له دوی سره په اوس وخت کې اړیکې نه درلودې او د فعالیت ساحه یې پاکستان کې ده.
کورنیو چارو وزارت په دې اړه څه نه وایي، خو استخباراتي مالومات ښیي چې دغه ډله افغانستان کې د داعش په نوم فعالیت کوي او جلب او جذب یې روان کړی.
د ملګرو ملتونو د بندیزونو کمېټې د جیش محمد ډلې مشر مسعود اظهر چې په پاکستان کې اوسي، له القاعده شبکې او نورو نړیوالو ترهګرو سره د اړیکو لرلو په تور په تور لېست کې داخل کړ.
له دې پرېکړې سره سم به د مسعود اظهر ملکیتونه ضبط شي، پر سفرونو به یې بندیز ولګېږي او د وسلې ګرځولو جواز به هم نشي اخیستلی.
په ټوله کې د مسعود اظهر له ور شاملېدو سره اوس د ملګرو ملتونو د نړیوالو ترهګرو په لېست کې ۴۲۲ کسانو نومونه شامل دي.
طالب ویاند ذبیح الله مجاهد وایي، جیش محمد ډله له دوی سره هېڅ اړیکې نه لري او د هغوی د فعالیت ساحه په پاکستان کې ده.
مجاهد له شمشاد سره په خبرو کې ومنله چې د دوی د امارت په وخت کې دغې ډلې سره اړیکې درلودې، خو د وخت په تیریدو ختمې شوې.
که څه هم تر دې وړاندې چین درې ځله د ځینو تخنیکي ستونزو له امله مخالفت کړی چې جیش محمد ډله په تور لیست کې شامله نه شي، خو دا ځل چین هم د ملګرو ملتونو له دغې پرېکړې سره موافقه کړې ده.
هند هم د ملګرو ملتونو د بندیزونو د کمېټې له دغې پریکړې هرکلی کړی او پاکستان ویلي، د ملګرو ملتونو له دې پرېکړې سره یې مخالفت نه دی کړی.
د افغانستان د کورنیو چارو وزارت مسوولین په دې اړه د مالوماتو ورکولو ته حاضر نه دي او دا خپل مسوولیت نه بولي.
خو استخباراتي مالومات ښيي چې جیش محمد ډله په افغانستان کې فعاله ده، په څو بریدونو کې لاس لري او لا هم د داعش په نوم فعالیت، جلب او جذب کوي.
هند پر خپله خاوره د څو خونړیو بریدونو پړه هم پر جیش محمد ډلې اچولې او له ۲۰۱۶ کال راهیسې له ملګرو ملتونو غواړي چې نوموړی د نړیوالو ترهګرو په لېست کې شامل کړي.
خو چین بیا په امنیت شورا کې د دې چارې مخنیوی کاوه.
