اسراييل د روسیې له دښمنۍ ډار لري
د اسراييلو لومړی وزیر بنیامین نتنیاهو وايي، له تیرو درېیو کلونو راهیسې یې په سوریه کې د ایران د نفوذ مخه نیولې ده.
نتنیاهو وايي، سوریه کې یوازې د ایران پر مرکزونو بریدونه کوي او د لاسوهنې موخه یې له روسیې سره جګړه نه ده.
د اسراييلو لومړی وزیر بنیامین نتنیاهو وايي، په سوریه کې یې درې کلنه جګړه او له اوږدې مودې راهیسې هوايي بریدونه یوازې د ایران او حزب الله پر ضد وو.
د اسراييلو لومړی وزیر، بنیامین نتنیاهو، ((په تیرو درېیو کلونو کې اسراييل په دې برخه کې ډير بریالی و چې په سوریه کې یې د ایراني ځواکونو د پرمختګ مخه نیولې ده. موږ سوریې ته د لبنان د حزب الله ډلې د وسلو د انتقال مخنیوی هم کړی دی.))
شنونکي وايي، اسراييل دا وضاحت ددې لپاره کوي چې د روسیې له دښمنۍ ډار لري.
نتنیاهو وايي، دغه جګړه یې له روسیې سره نه ده او له هغوی سره به نظامي همکاریو ته دوام ورکړي.
د اسراييلو لومړی وزیر بنیامین نتنیاهو، ((موږ به په سوریه کې د ایران له شتون مخنیوي ته همداسې دوام ورکړو. په ورته وخت کې به موږ له روسي ځواکونو سره پوځي همکاري هم ولرو. ما له ولادیمیر پوتین سره هوکړه کړې چې په نږدې راتلونکې کې په دې تړاو ناسته هم وکړو.))
نتنیاهو وروسته له هغې دا څرګندونې وکړې چې روسیې د تیرې دوشنبې په ورځ سوري ځواکونو ته د دفاعي سیسټم د استولو اعلان وکړ.
مسکو تیره اونۍ اسراييلي ځواکونه په دې هم ملامته کړي و چې په سوریه کې لاسوهنه کوي.
اسراييل د ایدلیب له جګړې وړاندې له سوریې سره په سرحدي سیمو کې هوايي بریدونه پیل کړي او لا دوام لري.
