ټرمپ یو ځل بیا د شمالي کوریا له مشر کېم جونګ اون سره ګوري.
د امریکا ولسمشر ډونالډ ټرمپ وايي، کېم جونګ اون ورته لیک استولی چې غواړي له هغه سره بیا وګوري.
اخوا د امریکا د بهرنیو چارو وزیر مایک پمپیو چې د دې لیدنې لپاره چمتو والی نیسي، وايي یو مناسب وخت ته منتظر دي.
ډونالډ ټرمپ چې د ملګرو ملتونو کلنۍ غونډه کې د ګډون په موخه نیویارک ته روان و، رسنیو ته وویل چې ډیر ژر به د شمالي کوریا له مشر سره وګوري.
د امریکا ولسمشر ډونالډ ټرمپ ویلي، ((ښکاري چې موږ به په نږدې راتلونکي کې دویمه لیدنه هم ولرو. تاسې پوهیږئ؟ کېم جونګ اون ماته لیک استولی، ښکلی لیک، چې په کې لیکلي
یې دي چې یو ځل بیا ناسته غواړي. موږ په دې برخه کې تر دې دمه ډیر پرمختګ کړی او ژر به وګورو.))
ټرمپ زیاته کړه چې د بهرنیو چارو وزیر مایک پامپیو په دې اړه هڅې پیل کړي چې ژر دا لیدنه ترسره شي.
همدا راز پمپیو هم ټینګار وکړ چې هڅه کوي د دغې لیدنې لپاره یو مناسب وخت وټاکي.
د امریکا د بهرنیو چارو وزیر مایک پمپیو وویل، ((موږ په تمه یو چې یو مناسب وخت او مناسب حالت برابر شي خو ولسمشر ټرمپ په بشپړه توګه چمتو دی چې له کېم جونګ اون سره ژر وګوري.))
په پام کې ده چې د ملګرو ملتونو په راتلونکې کلنۍ غونډه کې هم د شمالي کوریا د اټومي تړون په تړاو خبرې وشي.
کېم جونګ اون تیره اونۍ د سویلي کوریا له ولسمشر مون جاین سره د لیدنې پر مهال هم له ټرمپ سره د بیا لیدنې خبر ورکړ.
