د اسلامي امارت جګپوړي غړي، انس حقاني ویلي، بګرام د افغانستان او افغانانو دی او امریکا دا حق نه لري چې د بګرام هوايي اډه خپله کړي.
حقاني له یوه امریکايي یوټیوبر سره په مرکه کې زیاته کړې، بګرام د افغانانو په تاریخ کې د ښایست او ښکلاګانو سمبول و، خو د پخواني شوروي اتحاد او ورپسې د امریکا د یرغل په کلونو کې د بګرام د ښکلا انځور د وحشت او شکنجې په انځور بدل شو.
حقاني د هغو زرګونو بندیانو خاطرو ته په اشارې چې د دې هوايي اډې په زندان کې ساتل شوي، ویلي چې د هغوی د شتون نښې لا هم د بګرام پر دېوالونو پاتې دي.
انس حقاني زیاته کړې: « بګرام د افغانانو په تاریخ، روایاتو او کیسو کې د حسن او جمال یو انځور و، خو امریکایاتو او پخواني شوروي اتحاد دا انځور بدل کړ. د بګرام په زندان کې ډېر خلک شکنجه شوي، ماشومان شکنجه شوي، د بګرام په زندان کې ظلمونه شوي او له وحشت څخه کار اخیستل شوی. اوس نو امریکا راځي او وايي چې بګرام زموږ دی.»
انس حقاني په دې مرکه کې په افغانستان کې د بهرنیو هېوادونو پر لاسوهنو هم نیوکه کړې او ویلي یې دي چې افغانان نورو هېوادونو ته نه دي ورغلي بلکې بهرني ځواکونه د دوی هېواد ته راغلي.
حقاني په دې اړه زیاته کړې: موږ هیله لرو چې افغانستان یو ځل بیا د نورو د سیاستونو قرباني نه شي. موږ غواړو عادي ژوند وکړو او زموږ ماشومان او نوی نسل وکولی شي په عادي ډول زده کړې وکړي او له ژوند څخه خوند واخلي. هر ځل چې د نورو هېوادونو سیاستونه زموږ پر هېواد تپل شوي، ستونزې رامنځته شوې دي.»
انس حقاني په دې مرکه کې اسلام د سولې او عدالت دین بللی او ویلي یې دي چې اسلام د ټولو دینونو د پیروانو حقونه په رسمیت پېژني.
انس حقاني د بګرام په اړه دا څرګندونې داسې مهال کړې چې د متحده ایالاتو اوسني ولسمشر، ډونالډ ټرمپ، څو څو وارې د بګرام هوايي اډې پرېښودل د پخواني ولسمشر، جوبایډن ستره تېروتنه بللې او امریکا ته یې د دې اډې د بېرته سپارلو غوښتنه کړې.