د کندهار د شاه حسین افغان ـ ترک لېسې۵۰ تنو زدهکوونکو د ریاضي په نړیوالو سیالیو کې د ۱۴ هېوادونو ترمنځ ۳۴ مډالونه ګټلي.
دغه سیالۍ چې د ۲۰۲۵– ۲۰۲۶ ښوونیز کال په ترڅ کې په ټایوان کې ترسره شوې، د افغان ـ ترک لېسې زدهکوونکو په کې د پام وړ بریا ترلاسه کړې ده او دوو زدهکوونکو د سرو زرو، ۱۲ د سپینو زرو او ۲۰ نورو د برونزو مډالونه ترلاسه کړي دي.
کندهار کې د افغان ترک ښوونځي مسوولین وايي، د نړیوالو سیالیو راتلونکي پړاوونه په مالیزیا او کوریا کې هم ترسره کېږي او د دوی زدهکوونکي به په بېلابېلو علمي برخو کې ګډون وکړي.
کندهار کې د افغان ترک لومړني ښوونځي مدیر، محمد یونس نصرت وايي: « دا سیالۍ هرکال په لاره اچول کېږي. په ۲۰۲۵ – ۲۶ کال کې زموږ زده کوونکو د نورو هېوادونو له زده کوونکو سره سیالي وکړه او ښه مقامونه یې ترلاسه کړل. د دې سیالیو لومړی پړاو په ټایوان هېواد کې و او دوهم پړاو به یې په مالېزیا هېواد کې ترسره شي. ټاکل شوې د دې سیالیو وروستی پړاو په کوریا کې ترسره شي او زموږ زده کوونکي به هم د ریاضي، ساینس او انګلیسي په سیایلو کې برخه واخلي.»
د دغو سیالیو پوښتنې په انګلیسي ژبه وې او په دوو برخو وېشل شوې وې چې زدهکوونکي په کې له ریاضيکي عملي او ذهني محاسبې سره مخ وو.
د افغان ـ ترک لېسې زدهکوونکي وايي، په دغو سیالیو کې ګډون او مډالونه ترلاسه کول ورته د ویاړ خبره ده. دوی هیله لري چې په راتلونکو نړیوالو سیالیو کې به هم د افغانستان نوم لا روښانه کړي.
زده کوونکی محمد قاصد وايي: « ما په دې سیالیو کې د سپینو زرو مډال ګټلی او له دې امله ډېر خوښ یم. دا نه یوازې زما بلکې زما د کورنۍ او ټول افغانستان لپاره لویه لاسته راوړنه ده.»
زده کوونکی محمد شکران وايي: « ما په دې سیالیو(ډبیلواېمآی) کې لومړی مقام ترلاسه کړی. ما د دې سیالیو لپاره ډېره زحمت ایستل او د شپې به مې درسونه لوستل.»
د کندهار پوهنې ریاست مسوولین هم د دغو زدهکوونکو لاسته راوړنې د ستاینې وړ بولي او وايي، د علمي سیالیو په برخه کې د زدهکوونکو ملاتړ او هڅونه کوي.
د پوهنې ریاست ویاند، زبیر احمد ذاکرمل وايي: « د کندهار پوهنې ریاست د دې زده کوونکو د تشویق او ستاینې په موخه، په افغان – ترک عالي لېسه کې د دوی لپاره غونډه نیولې، ترڅو دوی د کندهار او بیا افغانستان لپاره نورې لاسته راوړنې هم راوړي.»
د افغان – ترک ښوونځي مسوولین وايي، زدهکوونکي د ریاضي، ساینس، انګلیسي او رباټیک په برخو کې روزل کېږي او د نړیوالو سیالیو لپاره لومړی په کندهار او بیا په افغانستان کې د ازموینو له لارې ټاکل کېږي.
