کابل کې د زرګرۍ صنعت او سرو زرو د لومړني نندارتون پرانستغونډې ته حکومتي چارواکي هم راغلي وو.
د صنعت او سوداګرۍ وزیر د دې درې ورځني نندارتون د پرانستلو پرمهال وویل چې افغانستان د سرو زرو د پروسېس او ډیزاین په برخه کې د پام وړ پرمختګ کړی.
نوموړي له پانګوالو وغوښتل چې په دې برخه کې پانګونه زیاته کړي او افغانستان باید د سرو زرو د پروسېس او ډیزاین په برخه کې له نړۍ سره سیال او د سرو زرو پر صادرونکي هېواد بدل شي.
نورالدین عزیزي وايي: « موږ غواړو د نړۍ او سیمې په کچه نندارتونو کې د افغانستان د سرو زرو برنډ او استازولي ولرو. غواړو ترڅنګ یې د افغانستان قېمتي ډبرې او جواهرات هم ولرو. هرڅومره چې د افغانستان د زرګرۍ او جواهراتو سکټور په دې برخه کې کار کوي او زحمت باسي، موږ یې په هماغومره کچه ملاتړ کوو؛ زموږ ملاتړ به هم د هېواد په کچه وي او هم د سیمې په کچه.»
په ورته مهال، د عدلیې وزارت مسلکي معین په بېلابېلو صنعتي برخو کې د نندارتونونو جوړول د پانګونې د جلب لپاره مهم ګڼي.
عبدالکریم حیدر زیاتوي چې د صنعتي برخې وده کولی شي هېواد پر ځان بسیا او اقتصادي پرمختګ رامنځته کړي.
نوموړي له صنعتکارانو وغوښتل چې په خپلو تولیداتو کې د کمیت ترڅنګ کیفیت ته هم جدي پاملرنه وکړي.
د عدلیې وزارت مسلکي معین زیاتوي: « صنعت په یوه هېواد کې ډېر حیاتي رول لري؛ ځکه هېوادونه د صنعت له لارې ځان بسیاینې ته رسېږي او پر خپلو پښو درېږي.»
په ورته مهال، د افغانستان د زرګرانو ټولنې مشر وايي، د زرګرۍ صنعت په برخه کې کابو سل زره کسان په کار بوخت دي، خو د حکومت ملاتړ نه لري.
د افغانستان د زرګرانو ټولنې رییس، بشیر احسانزاده وايي: « د دې نندارتون د جوړولو موخه زموږ د خپلو کورنیو محصولاتو معرفي کول، د دولت ملاتړ جلبول او په ځانګړې توګه د زرګرانونو لپاره د ملاتړ جلبونه ده. موږ هیله لرو چې نږدې راتلونکي کې بشپړې ځان بسیاینې ته ورسېږو او خپل صنعت د سیمې ټولو هېوادونو ته معرفي کړو.»
د نندارتون ګډونوال بیا وايي چې افغانستان د سیمې او نړۍ په کچه د سرو زرو د پروسېس او زرګرۍ د صنعت په برخه کې د سیالۍ وړتیا پیدا کړې ده.
د نندارتون ګډونوال، عزیزالله امین وايي: « موږ کولی شو د افغانستان د خپلو سروزرو په استخراج سره د افغان سرو زرو برنډ نړۍ ته معرفي کړو. د زرګرۍ د دې ډول نندارتونو له لارې کولی شو د افغانستان د سرو زرو صنعت نړۍ ته معرفي کړو.»
د نندارتون ګډونوال، صمیم نورزی وايي: « لکه څرنګه چې تاسو ته معلومات دی، له دې وړاندې هر ډول سره زره له ګاونډیو هېوادونو او دوبۍ څخه راتلل. موږ اوس په دې صنعت کې داسې ځای ته رسېدلي یو چې له دوبۍ سره هم سیالي کوو. موږ له افغانستان څخه د سرو زرو صادراتو ته بشپړ چمتوالی لرو.»
دا نندارتون چې په لسګونو غرفو کې یې د صنعتکارانو له لوري پروسېس او ډیزاین شوي سره زر نندارې ته وړاندې شوي، درې ورځې به دوام ولري.
د چارواکو په خبره، د دې نندارتون موخه په هېواد کې د زرګرۍ د صنعت وده او په دې برخه کې د لا ډېرو پانګونو جلبول دي.
