هرات د هېواد له لویو ولایتونو څخه دی چې له ایران سره د ګډې پولې له امله، د نورو ولایتونو ډېری مسافر له همدې لارې تګ راتګ کوي. ډېری وخت د اوږدو سفرونو پر مهال د ځینو موټر چلوونکو بېاحتیاطي، د خونړیو ټرافیکي پېښو لامل ګرځي.
اوس د ټرانسپورټ او هوایي چلند وزارت مسوولین وایي، لویو لارو باندې د مسافر وړونکو موټرو سرعت تنظیم او ټرافیکي پېښو مخنیوي په موخه تر اوسه د هېواد په کچه ۴۷ زره نقلیه وسایطو کې «جيپياېس» سیسټم نصب شوی.
د ټرانسپورټ او هوایي چلند وزارت د تخنیکي خدمتونو او مصونیت رییس حفیظالله حلیمي وايي: « ټرانسپورټ وزارت مسافر لېږدونکو بسونو لپاره د سرعت کچه ټاکلې او باید په ساعت کې له ۱۰۰ تر ۱۰۵ کیلومټرو سرعت ولري. که د دوی سرعت له دې پروته شي، د جيپياېس له لارې ښکاري چې په کوم سرعت روان دی.»
په ورته مهال، د مسافروړونکو شرکتونو یو شمېر مسوولان د دې طرحې هرکلی کوي او وایي، د جيپياېس سیسټم لګول د غیر مجاز سرعت په راکمولو، د تګ راتګ د نظم په ښه کېدو او د لویو لارو د ټرافیکي پېښو په کمولو کې مهم رول لوبولی.
د یوه ټرانسپورټي شرکت مسوول حمیدالله بارکزی وايي: « موږ خپلو مسافرو ته ځانګړې پاملرنه او هیله لرو چې دوی په خوشاله او روغه بڼه سفر ولري.»
د ټرانسپورټي شرکت مسوول نذیر احمد ظریفي وايي: « په موټرو کې یې جيپياېس نصب کړی او دا ډېر ښه کار شوی. باید د دوی سرعت کنټرول شي. شرکتونه هم باید خپلو موټر چلوونکو ته ووايي چې په ټاکل شوي سرعت موټر وچلوي.»
له بلې خوا، د هرات اوسېدونکي هم د دې پروګرام له پلي کېدو خوښي څرګندوي او وایي، د نقلیه وسایطو پر سرعت څارنه کولی شي د سفر پر مهال د مسافرو خوندیتوب زیات او د ټرافیکي پېښو له امله رامنځته کېدونکې مرګژوبلې کچه راټیټه کړي.
موټر چلوونکی عبدالبصیر وايي: « زموږ موټر په ۱۰۰ کیلومټرو کې قلف دي، موږ او مسافر دواړه له دې کار راضي یو.»
مسافر حافظ نورالله وايي: « مهمه دا ده چې مسافر آرام او خوندي سفر ولري. موږ له دې کار خوښ یو.»
مسوولین نقلیه وسایطو کې د «جيپياېس» سیسټم د نصبولو موخه د موټرچلوونکو د چلند مدیریت، د نقلیه وسایطو د سرعت کنټرول، د سفرونو د خوندیتوب لوړول او د هېواد په لویو لارو کې د ڼرافیکي پېښو کمول بولي.
