د هلمند ټولګټو چارو ریاست مسوولان وايي، د هلمند – هرات او هلمند- کندهار لویې لارې د دویم لین سړک د نښلولو لپاره د پخواني پله پر ځای د نوي پل جوړولو چارې یې پيل کړې دي چې شاوخوا ۲۷۰ میلیون افغانۍ لګښت پرې راځي.
د هلمند ټولګټو چارو ریاست د کار او ساختمان آمر ګل احمد ویاړ وايي: « د ګرېشک ولسوالۍ په ساحه کې پر هلمند سیند د ۲۷۰ میلیونه افغانیو په لګښت یو پل جوړېږي چې چارې به یې په دوه نیمو کالو کې بشپړې شي. دا پل ۳۳۷ متره اوږدوالی او ۱۲ متره سور لري.»
په ورته مهال، د دې پروژې پلي کوونکی شرکت وايي ، دا پل به د نړیوالو معیارونو له مخې د دوه نیمو کلونو په موده کې جوړ کړي چې په تخمیني توګه یې د استقامت موده له ۷۰ تر۱۰۰ کلونو اټکلېږي.
د پروژې انجینر سید آغا وايي: « دا پل د هلمند – کندهار لویې لارې پرمخ پروت دی. دا پل به دوه لینه وي او د درنو بار لېږدونکو موټرو لپاره ډیزاین شوی دی. دغه پل به له ۷۰ تر ۱۰۰ کالو پورې عمر ولري.»
بله خوا، د سیمې اوسېدونکي او د باروړونکو موټرو چلوونکي بیا پر اوسني پله د موټرو زیاته ګڼه ګوڼه د لارې د تړل کېدو لامل بولي او وايي، پر دې تخریب شوي پله د مسافرو او موټر چلوونکو ازدحام، ګڼې ستونزې رامنځته کړي چې د نوي پله له جوړېدو سره به تر ډېره پورې ې حل شي.
موټر چلوونکی عبدالرحمن وايي: « کله چې دا زوړ پل بند شي، موږ له یو تر دوه ساعتونو پورې ځنډیږو. دلته ډېرو کسانو سره ناروغان او حتا مړي وي، خو د پله د تړل کېدو له امله سخت حالت سره مخ وي. اوس چې دویم پل جوړېږي، موږ ډېر ورته خوشاله یو.»
د ګرېشک اوسېدونکی عصمت الله وايي: « دویم پل د ولس لپاره لوی خدمت دی، ځکه دلته خلک او موټر چلوونکي له ستونزو سره مخ دي.»
د یادونې وړ ده چې تېره ورځ هم د هلمند په موسی کلا ولسوالۍ کې د ۹۰ میلیونه افغانیو په لګښت د یوه بل پله د جوړېدو چارې پیل شوې وې.
