د مخابراتو او معلوماتي ټکنالوژۍ په نوښت جوړ شوي اته ورځني نندارتون کې ګډون کوونکي شرکتونه وايي، په هېواد کې د عصري ټکنالوژۍ د ودې په موخه اړتیا ده چې دا ډول نندارتونونه جوړ شي، ترڅو ځوان نسل عصري ټکنالوژۍ ته مخه کړي.
د دوی په خبره، اوس ټوله پرمختللې نړۍ د عصري ټکنالوژۍ په زور او فکر روانه ده او اړتیا ده چې ټول افغان ځوانان هم عصري ټکنالوجۍ ته وهڅول شي.
نندارتون کې د یوې غرفي مسوول محمد اسلام حسیني وايي: « له مخابراتو وزارت او اترا ادارې څخه مننه کوم چې د مخابراتو او ټکنالوژۍ لپاره ځانګړی نندارتون یې جوړ کړ. دا ډول نندارتونونه فرصت برابروي چې خلک د افغانستانه له داخلي مخابراتي تولیداتو سره وپېژني.»
د یوې بلې غرفې مسوول محمد عابد وايي: « له حکومت مننه کوو چې دا ډول نندارتون یې جوړ کړ. موږ له دې لارې له خپلو تولیداتو سره پېژنو.»
د دې نندارتون ګډون کوونکي دغه راز وایي، دا ډول نندارتونه دوی ته روحیه ورکوي چې څنګه د نوې او عصري ټکنالوژۍ کارولو ته مخه کړي.
دوی له اسلامي امارت غواړي چې ټولو ځوانانو ته داسې زمینې برابرې کړي، ترڅو په اوسني عصر کې له ټکنالوژۍ سره بلد شي.
د نندارتون ګډونواول خالد وايي: « له هېوادوالو غوښتنه کوم چې راشي او ګډون وکړي، ځکه په دې ډېر مصرف شوی او ډېر زحمت ایستل شوی.»
د نندارتون ګډونوال حمید الله وايي: « له حکومت هیله کوو چې دا ډول نندارتونونه نور هم جوړ شي او خلک هم باید ګډون وکړي.»
چارواکي وایي، په دې نندارتون کې شاوخوا ۲۰۰ غرفې شته چې په ټولو کې د عصري ټکنالوژۍ وسایل نندارې ته وړاندې شوې دي.
د دوی په خبره، په دې نندارتون کې د کورنیو شرکتونو ترڅنګ، بهرنیو شرکتونو هم خپل محصولات نندارې ته وړاندې کړې.
د اسلامي امارت چارواکي همدارنګه په ځوان نسل غږ کوي چې دا نندارتون له نږدې وګوري، ترڅو د اوسنۍ نړۍ د عصري ټکنالوژۍ په رازونو خبر او په پرمختګ له نږدې وګوري.
د دوی په خبره، اسلامي امارت لا هڅه کوي چې په هېواد کې د عصري ټکنالوژۍ ورته نور نندارتونه هم جوړ کړي.
د مخابراتو او معلوماتي ټکنالوژۍ وزارت ویاند عنایتالله الکوزی وايي: « په دې نندارتون کې ۲۰۰ غرفې فعالې شوې او په مختلفو شرکتونو پورې اړه لري. په دې کې زموږ پنځه لوی مخابراتي شرکتونه دي، همدارنګه د ټکنالوژۍ او سټارټ اپ شرکتونه دي او دغه راز د بانکونو او آنلاین تادیاتو برخې هم شته دي.»
د اترا ادارې ویاند جلالالدین شمس وايي: « دا زموږ خلکو ته لوی فرصت دی چې دوی په خپل هېواد کې د مخابراتو او معلوماتي ټکنالوژۍ په برخو کې شوي پرمختګونه وویني. په ځانګړې توګه زموږ هغه محصلین چې په دې برخو کې زده کړې کوي، دا دوی ته فرصتونه برابرېږي چې خپلې زده کړې په عملي توګه وویني.»
د مسوولینو په خبره، د دې نندارتون لویه موخه دا ده چې هېوادوال په افغانستان کې له تولید شویو مخابراتي او ټکنالوژيکي توکو او دغه راز له مخابراتي خدمتونو سره وپېژني.
