د افغانستان سولې لپاره د امریکا پخواني ځانګړي استازي زلمي خلیلزاد په خپلو تازه څرګندونو کې د پاکستان د اټومي وسلو نا خوندیتوب په تړاو اندېښنه ښودلې.
خلیلزاد د یوې جرمنۍ رسني د هغه مستند په اساس چې په کې په پاکستان کې ګڼو روانو ناورینونو او بحرونو ته اشاره شوې، په استدلال سره ويلي چې په پاکستان کې روان امنیتي وضیعت د دې هېواد د اټومي وسلو خوندیتوب ته ګواښ پېښولی شي.
خلیلزاد ویلي: « په پاکستان کې اوسنی امنیتي وضیعت د اټومي وسلو خوندیتوب له خطر سره مخامخوي.»
کارپوهان بیا وايي، نه یوازې دا چې پاکستان کې ناامنۍ په کورنۍ جګړې بدلې شوې دي بلکې د دې هېواد نظامیان د ترهګرو ملاتړي پاتې شوي او لاهم دوام ورکوي، سیمه او هېوادونو کې د نا امنیو اوبې ثباتۍ رامنځ ته کولو په موخه ترې کار اخلي.
د دوی په خبره، داسې یو هېواد چې د ترهګرۍ ملاتړی کوي او نا امني په کې اوج ته رسېدلې وي، سیاسي او اقتصادي کړکېچ یې له کنټرول وتلی وي؛ اټومي وسلې یې له له ګواښ سره مخ کېږي او ټولې نړۍ ته خطر پېښولی شي.
د سیاسي چارو شنونکی شهزاده مسعود وايي: « که د پاکستان اوسنی وضعیت ته وکتل شي، هم په امنیتي، هم په سیاسي او هم په اقتصادي لحاظ سخت خراب دی. له بلې خوا، ترهګري روزل او وده ورکول هم د دې ښکارندويي کوي چې ښايي د پاکستان اټومي ځواک د ترهګرو لاس ته ولوېږي او بیا به ټولې نړۍ ته خطرونه پېښ کړي.»
غوښتنه بیا دا ده چې د اټومي وسلو او انرژۍ د کنټرول نړیوال سازمانونه او نړیواله ټولنه باید د پاکستان اټومي وسلې خوندي ځای ته انتقال او سیمه او نړۍ یې له ګواښ څخه وژغوري.
د سیاسي چارو شنونکی کما ناصر اصولي وايي: « د پنجاب پوځ یو کرايي پوځ دی او په سیمه کې د نا امنیو خپرولو او نظامونو ړنګولو لپاره کارول کېږي. دا ډول یوه پوځ ته اټومي وسلې په لاس ورکول د سیمې او نړۍ لپاره ګواښ دی. باید نړیوال او د اټومي وسلو د کنټرول سازمانونه د پاکستاني اټومي وسلې یوه امن ځای ته یوسي؛ ځکه په پاکستان کې نا امني اوج ته رسېدلې او دوی لاهم د ترهګرو په روزلو بوخت دي.»
په هغه مستند کې چې د یوې جرمنۍ رسنۍ له خوا په پاکستان کې د روان وضیعت په تړاو نشر شوی، ویل شوي چې په دې هېواد کې سخت دریځي، د تاوتریخوالي زیاتېدل، مالي او اقتصادي رکود، سیاسي کړکېچ، د پوځ له خوا د مخالفوسیاستوالو سیاسي مشرانو زنداني کول، د فاسدو چارواکو واکمني او پر سیاست یې د پوځ نفوذ هغه عوامل دي چې پاکستان یې له ګڼو ناورینونو سره مخ کړی.
