د نوموړي په خبره،په دغو ۲ زره امنیتي پیښو کې ملکیانو ته هم زیان رسیدلی دی.
ډار په دې اړه وايي:« روان کال په پاکستان کې له ۲ زرو ډېرې امنیتي پېښې رامنځ شوې چې له امله یې تر ۵۶۰ زیات کسان وژل شوي دي او زیاتره دغه بریدونه د پاکستان پر امنیتي ځواکونو او ملکي وګړو شوي دي.»
خو د سیاسي چارو تحلیل کوونکي بیا وايي، په پاکستان کې د روانو ناامنیو او امنیتي پیښو اصلي لامل د دغه هېواد نظامیان دي چې تل یې د پیسو په بدل کې د نورو کرايي پروژې اخیستي او پرمټ یې وران کارې ډلې او ټپلې روزلي او لاهم دوام ورکوي .
دوی وايي، اوس نړۍ ته ثابته ده چې ټولې وران کارې ډلې په پاکستان کې مرکزونه او پټن ځایونه لري او اسلام اباد یې د نورو ناامنه کولو لپاره ملاتړ کوي.
دپوځي چارو شنونکی توریالی ځاځی وایي:« دا ۲ زره امنیتي پېښې چې په پاکستان کې شوې دي، لامل یې په خپله د پاکستان پوځ او آیاېسآی دي، ددې لپاره چې دا دواړه د بهرنیو هېوادونو باقدرته هېوادونو پروژې دي او دا ناامني په پاکستان کې نوره هم زیاتېږي؛ د دې لپاره چې پاکستان سیاسي ثبات نه لري او د خپلو اقتصادي ګتو لپاره له هر هېواد سره خپلې اړېکې ساتي او له بلې خوا دا تروریستي ډلې اوس ټولې نړۍ ته ثابتې شوې چې په پاکستان کې دي.»
ځینې نور بیا په دې باور دي چې د پاکستان د ناسمو ستراتيژیو او په دغه هېواد کې له خلکو سره د دوه ګوني چلن له امله په پاکستان کې ناامني رامنځ ته شوې او هغه وسله وال چې د پاکستان پر وړاندې جګړه کوي هم د پاکستاني پوځ د سیاستونو زیږنده ده.
دزابل پخوانی مرستیال والي جمعه خان فاتح وايي:«که نن ورځ پاکستان ناامنه دی خو دلیل یې د پاکستان نامناسب حرکات او ظلم دی، چې په مقابل کې یې ټيټيپيراپورته شوې؛ خو که دا ډلې یې پر وړاندې جنګېږي نو د دوی خپلې دي او هلته مرکزونه لري او په خپله هم پوهېږي چې دا ډلې د پاکستان د حکومت د ظلم او بې عدالتۍ له امله راپورته شوې دي.»
د سیاسي چارو شنونکی شهزاده مسعود بیا وايي، د پاکستان د ناامنۍ یو لامل د دغه هېواد ناسم اقتصادي او سیاسي وضیعت هم دی چې پاکستان یې له پراخې ناامنۍ سره مخ کړی دی.
د مسعود په خبره، پاکستان ته پکار ده چې د خیبرپښتونخوا او بلوچستان ازادو ولسونو غوښتنو ته درناوي وکړي او له خپلو ګاونډیو سره شته ستراتیژیو کې بدلون راولي.
مسعود په دې اړه وايي:«پاکستان چې کومه پالیسي پر مخ بیایي اصلي لامل یې دا دی، چې نن پاکستان په سیاسي، امنیتي او اقتصادي لحاظ په یو بد وضعیت کې قرار لري؛ که چېرې پاکستان غواړي چې په سیمه کې امنیت وي، ثبات وي نو ښه لاره یې دا ده چې له ګاونډیانو په ځانګړي ډول له افغانستان سره د یوې متمدنې او نېکې لاره خپله کړي او دا په هغه صورت کې کېدلی شي چې د پاکستان پوځ په خپله پالیسۍ کې بدولون راولي.»
تازه د پاکستان تر کنټرول لاندې ټانک سیمه کې د پولیسو او پوځیانو په ګډې پوستې موټر بم برید شوی چې ۱۵ تنه نظامیان په کې وژل شوي او ۲۵ نورټپیان دي.
