د روسیې د داغستان او تیومن ولایتونو، قزاقستان او د افغان سوداګرو او پانګوالو ترمنځ د ۴۴۰ میلیون افغانیو په ارزښت سوداګریز هوکړه لیکونه لاسلیک شول.
د افغانستان سوداګرۍ او پانګونې خونه وايي، دغه تړونونه د مخامخ سوداګریزو ناستو(بيټوبي) پرمهال لاسلیک شوي.
د دې ادارې ویاند احسان الله احسان په خبره، د روسیې د داغستان او تیومن ولایتونو او قزاقستان ګډ سوداګریز پلاوی چې د شنبې په ورځ کابل ته راغلی و، د دوشنبې په ورځ د افغانستان د سوداګرۍ او پانګونې په خونه کې له یو شمېر افغان سوداګرو او پانګوالو سره د سوداګریزو هوکړه لیکونو لاسلیک کولو لپاره په ګډه سوداګریزه غونډه کې ګډون وکړ.
په دې سوداګریزه غونډه کې د افغانستان د سوداګرۍ او پانګونې خونې لوړ پوړو چارواکو او یو شمېر افغان سوداګرو او پانګوالو هم ګډون درلود.
احسان زیاتووي چې د روسيې او قزاقستان د ګډ سوداګریز پلاوي له لوري د روسیې د داغستان ولایت د صادراتو رئیس، د تیومن ولایت د سوداګرۍ خونې مرستیال او یو شمېر روسي او قزاقي سوداګرو او پانګوالو چې د خوراکي توکو(خوراکي غوړي، چای او غلو دانو)، ساختماني موادو او فلزاتو په برخو کې فعالیت لري، هم ګډون درلود.
د سرچینې په خبره، د دې سوداګریزې غونډې په پای کې د افغانستان او د روسیې د داغستان، تيومن او قزاقستان د سوداګرو او پانګوالو ترمنځ د ساختماني چارو، درملو، خوراکي توکو او کرنیزو خدمتونو په برخو کې د ۴۴۶ میلیون او ۶۲۰ زره افغانیو په ارزښت سوداګریز هوکړه لیکونه لاسلیک شول.
د سواګرۍ او پانګونې خونې چارواکي دا ډول ناستې مهمې او اغېزناکې ګڼي او د هېواد اقتصادي ودې لپاره د دولتونواو خصوصي سکټورګډه همکاري مهمه بولي.
