افغانستان کې د ملګرو ملتونو د پراختیايي پروګرام او نورو نړیوالو ادارو د فعالیت ترڅنګ، تازه یوخ بهرني خصوصي شرکت هم په دې برخه کې نوی فعالیت پیل کړ.
د روپاني بنسټ اړوند د «اپیکس امانت» په نوم مالي او د وړو پورونو شرکت د افغانستان بانک په رسمي جواز تر دې وروسته هغو افغان متشبثو ته د وړو او منځنیو کاروبارونو په برخو کې له پنځه زره تر یونیم میلیون افغانیو پور ورکوي چې د دې شرکت له لوري روزنه ورکړل شوې وي.
له دې سره، افغانان کولی شي خپل شخصي کاروبار پیل او د کاري فرصتونو په برخو کې اسانتیاوې رامنځته کړي.
د روپاني بنسټ رییس نصرالدین روپاني وايي: « اپیکس امانت شرکت به د افغانستان ځوانانو، بزګرانو، وړو کاروباریانو، راستنېدونکو، کسبه کارانو، د خدمتونو وړاندې کوونکو او سوداګریزو بنسټونو ته د اسلامي شریعت له اصولو سره سم، مسوولانه او اغېزناک مالي خدمتونه وړاندې کړي. زموږ موخه یوازې تمویل نه بلکې د فرصتونو رامنځته کول هم دي.»
د افغانستان بانک مسوولان د ورته وړو تمویلي پروګرامونو رامنځته کېدل د هېواد مالي او خصوصي سکټور په وده کې اغېزناګ ګام یادوي او زیاتوي چې دې بانک له تېرو پنځو کلونو راهیسې د ګڼو مالي شرکتونو وړتیاوو ته په کتو، هغوی ته په ملي، د زون او ولایت په کچه د کرنې، سوداګرۍ او وړو تمویلونو په برخه کې د فعالیت اجازه ورکړې.
بلو پلو، د صنعت او سوداګرۍ وزارت دغه نوښت ستايي او زیاتوي چې په افغانستان کې د بهرنۍ پانګونې په موخه یې ګڼو مالي شرکتونو ته د فعالیت سهولتونه ایجاد کړي او دې کار ته دوام ورکوي.
د افغانستان بانک د غیربانکي مالي څارنې مرستیال شاهپور میاخیل وايي: « د افغانستان بانک پرېکړه دا ده چې د دې ډول موسسو په ملاتړ سره وکولی شي په ټول هېواد کې هغو خلکو ته مالي امکانات برابر کړي چې د کار وړتیا لری، خو مالي امکانات نه لري. زموږ له مقرراتو سره سم، درې ډوله جوازونه ورکول کېږي، چې یو یې په ملي کچه، بل د زون په کچه او درېیم یې هم د ولایت په کچه دي.»
د صنعت او سوداګرۍ وزارت سلاکار محمد سلیم ستانکزی وايي: « د صنعت او سوداګرۍ وزارت په استازیتوب مو د پانګوالو لپاره اسانتیاوې برابرې کړې دي او په هره برخه کې یې ملاتړ کوو.»
په ورته مهال، اقتصاد وزارت وايي اسلامي امارت په هېواد کې د بهرنۍ پانګونې له مخې ټول خنډونه لرې کړي او په خبره یې اټکل دا دی چې د همدې بهیر په دوام سره به افغانستان تر راتلونکو پنځو او لسو کلونو پورې د سیمې د اتصال مهم هېواد وي.
د اقتصاد وزارت مسلکي معین عبداللطیف نظري وايي: « افغانستان کې پانګونه د ودې او پراختیا په حال کې ده؛ هم ملي او هم بهرني پانګوال د ښه امنیت، فساد نه شتوالي او بیوروکراسۍ له منځه تللو پانګونه کوي. دوی ته صنعتي ښارګوټي ځانګړي شوي، د برېښنا انرژي او نورې اسانتیاوې ورته برابرې شوې، مالیاتي تخفیفونه ورکړل شوي او نور سهولتونه ورته برابر دي.»
دا داسې مهال ده چې د ملګرو ملتونو د پراختیايي پروګرام د ارزونو په اساس، د پلازمېنې کابل په ګډون د هېواد په ګڼو ولایتونو کې ډېری افغانانو وړو کاروبارونو ته مخه کړې، خو د لازمو اسانتیاوو او د مالي ملاتړ د نه شتون له کبله نه شي کولی خپل فعالیت ته دوام ورکړي.
«یوانډيپي» د دې ستونزې د هوارۍ لپاره بهرنۍ مرستې او مالي ملاتړ مهم یاد کړی او د نړیوال بانک ترڅنګ یې پر بهرنیو پانګوالو هم د مرستې غږ کړی.
