پلازمېنه کابل کې د صنعت او معدن اوونۍ پنځم نړیوال ۷ ورځني نندارتون، د حکومتي چارواکو، د خصوصي سکټور غړو، بهرنيو پانګوالو او ډېپلوماټانو په ګډون، پرانستل شو.
د ریاست الوزرا اداري مرستیال د دې نندارتون پرانستغونډې ته خبرو کې وايي چې په کور دننه صنعتي پرمختګ زیات شوی او هېواد مو په ډېرو برخو کې پرځان بسیا شوی دی.
مولوي عبدالسلام حنفي دغه راز وايي چې جدي هڅې پیل شوې دي چې افغانستان له وارداتي حالته را و ایستل شي او په یو ستر صادراتي هېواد بدل شي.
عبدالسلام حنفي زیاته کړې: « د افغانستان اسلامي امارت په بشپړه توګه له خپلو سوداګرو، پانګوالو او ملي تاجرانو ملاتړ کوي. موږ هڅه کوو افغانستان له یوه وارداتي هېواد څخه په یوه صادراتي هېواد بدل کړو.»
د دولتي شرکتونو لوی رییس احمد جان بلال وايي: « زموږ بنسټیزه سټراټیژي دا ده چې په لومړي سره کې خپل ظرفیت لوړ کړو، ترڅو د هېوادوالو د اړتیا وړ توکي په کور دننه تولید شي. دغه راز له خصوصي سکټور سره همکاري کوو چې د سالمې سیالۍ او ګډې پانګونې له لارې د هېواد صنعت ته نوې بڼه ورکړو.»
د ریاست الوزرا اداري مرستیال دغه راز له هغو هېوادونو چې په تېرو پنځو لسیزو کې یې په افغانستان کې پرجګړې پانګونه کړې وه، وغوښتل چې اوس کولی شي د افغانستان صنعتي ودې او اقتصادي پرمختګ په برخه کې پانګونه وکړي.
د ریاست الوزرا اداري مرستیال په دې اړه وايي: « هغه هېوادونه چې پخوا یې پر جګړو پانګونه کوله، نن دې راشي او د کانونو، انرژۍ او سړکونو په برخه کې د پانګونه وکړي. نن د افغانستان او سیمې هېوادونو لپاره تر ټولو ښه فرصت برابر دی. موږ خپلو سوداګرو، د ګاونډیو هېوادونو، سیمې او نړۍ سوداګرو ته بلنه ورکوو چې راشي او د افغانستان پر کانونو پانګونه وکړي؛ ترڅو هم خپله ګټه وکړي او هم افغانانو ته ګټه ورسوي.»
په همدې حال کې د افغانستان د صنعت او کانونو خونه بیا د نندارتونو جوړول د صنعتي ودې په برخه مهم ګڼي او زیاتوي چې له داخلي تولیداتو ملاتړ کولی شي افغانستان له اقتصادي پلوه پرځان بسیا کړي.
د صنعت او کانونو خونې رییس حاجي احمد نبي زاده وايي: « موږ له کورنیو او بهرنیو پانګوالو څخه غواړو چې د کانونو پروسېس لپاره پانګونه وکړي؛ ځکه افغانستان نه یوازې د خامو موادو سرچینه ده بلکې د یوه ستر صنعتي او اقتصادي بازار ظرفیت هم لري. زموږ اساسي موخه دا ده چې افغانستان له یوه مصرفي اقتصاد څخه تولیدي، صنعتي او صادراتي اقتصاد ته بدل کړو. داسې یو اقتصاد چې پر خپلو منابعو، خپلو تولیداتو او خپل بشري ځواک متکي وي. موږ باور لرو چې د کورنیو تولیداتو ملاتړ او د پانګونې اسانتیاوې کولی شي افغانستان د سیمې په یوه مهم اقتصادي او صنعتي مرکز بدل کړي.»
په کابل کې د ایران سرپرست سفیر د نندارتون پرانستغونډې ته د خبرو پرمهال ویلي، هېواد یې د افغانستان د بهرني اقتصاد محوره سیاست پر بنسټ له افغانستان سره ښې او نږدې سوداګریزې او سیاسي اړیکې لري او په افغانستان کې د ایراني سوداګرو فعالیت د دې ښکارندويي کوي چې تهران له کابل سره هر ډول همکاریو ته چمتو دی.
علي رضا بېکدلي زیاته کړې: « د ایراني اسلامي جمهوریت لوی پلاوی په دې نندارتون کې یوازې سمبولیک ګډون نه لري بلکې د دواړو هېوادونو ترمنځ د اقتصادي اړیکو پياوړتیا ته د ایران ژمنتوب څرګندوي. په دې نندارتون کې برخه اخستونکي ایراني شرکتونه په مختلفو برخو لکه کاني صنایعو، ماشین آلاتو، صنعتي تجهیزاتو، ودانیزو موادو، انرژۍ، د انجینرۍ خدمتونو او نوې ټکنالوژۍ کې فعالیت لري.»
په ورته مهال، د نندارتون ګډونوال سوداګر وايي چې اوسمهال د افغانستان په بېلابېلو صنعتي برخو کې زیاته پانګونه شوې او د داسې ملي او نړیوالو نندارتونو جوړول کولی شي د دوی پانګونې ته لا وده ورکړي.
یو تن سوداګر وايي: « نندارتون د تولیدي توکو د لیدل کېدو سبب کېږي. زموږ خلک د دې ډول نندارتونونو له لارې خبرېږي چې هېواد کې یې کوم توکي تولیدېږي. زموږ ډېری تولیدي توکي د نورو هېوادونو په پرتله ښه کیفیت لري.»
یوتن بل سوداګر وايي: « دا ډول نندارتونونه نه یوازې زموږ د تولیداتو لپاره ګټور دي بلکې د ټول هېواد لپاره ګټه لري. دلته بهرني شرکتونه، پانګوال او سوداګر هم راځي او زموږ له تولید شویو توکو سره معرفي کېږي.»
د صنعت او معدن اوونۍ دا نندارتون چې د چهارشنبې په ورځ پرانستل شو، د روانې میاشتې تر شپاړلسمې نېټې به دوام ولري. د نندارتون په ۳۶۵ غرفو کې بېلا بېل کورني تولیدات نندارې ته وړاندې شوي چې د اقتصاد پوهانو په خبره، کولی شي په هېواد کې د پانګونو فرصتونه په ډاګه کړي.
