که څه هم ماه رنګ بلوڅ لا په دې اړه تازه څه نه دي ویلي، خو د بلوڅانو یووالي کمېټې پرخپله اېکس پاڼې د ماه رنګ بلوڅ یو لیک خپور کړی چې هغې ته پر منسوبه اېکس پاڼه هم خپور شوی دی.
په لیک ویل شوي چې د پاکستان حکومت او قاضیانو د پرېکړو پر ضد یې له تېرو اتو ورځو راهیسې پرلت او احتجاج پیل کړی.
د لیک یوه برخه:« موږ د حکومت او قاضیانو د پرېکړو پر ضد له تېرو اتو ورځو یا ۱۹۲ ساعتونو راهیسې په زندان کې دننه پرلت او احتجاج پیل کړی. په دغه پرلت او احتجاج کې صبغت الله بلوڅ، بیبرګ بلوڅ، بیبو بلوڅ او ګلزادي بلوڅ هم راسره دي.»
په لیک کې ادعا شوې چې حکومت او د قضا برخې چارواکي په پرلپسې ډول د دوی د خلاصون مخه نیسي، ضمانوتونه یې ردوي، په زندان کې له لا ډېرې مودې ساتلو لپاره یې په بېلابېلو تورونو تورنوي او د پرانیستې محکمې پر ځای په یوه ځانګړې محکمې کې سزاګانې ورته ټاکي.
په لیک کې دوی غوښتنه کړې چې قضیه دې یې د خصوصي محکمې پر ځای په یوه پرانیستې محکمه کې ترسره شي او همداراز یې د ترهګرۍ ضد محکمې قاضي محمد علي مبین د بدلون غوښتنه هم کړې ده.
ډاکټرې ماهرنګ ویلي چې زندانونه یې د مبارزې برخه دي او له حقغوښتنې یې نه شي لاسپهسر کولی.
د لیک یوه برخه:« زندانونه زموږ د مبارزې اصلي اړخ دی او موږ هیڅکله چمتو نه یوو چې له خپلې مبارزې په شا شوو، ځکه موږ نه غواړو چې له خپلې حق غوښتنې لاس په سر شوو.»
د ماه رنګ او بي وای سي ځینو نورو فعالانو مدافع وکیل اسرار جتک له رسنیو سره په خبرو کې ویلي چې د ماه رنګ او صبغت الله شاه په ګډون د بي وای سي فعالانو پر ضد دا قضیه په ۲۰۲۴ کال کې د بلوچستان په ګوادر کې د بلوچ راجي مچي په نامه غونډې په ترڅ کې د امنیتي ادارو یوه کس وژل کېدو په تړاو ثبت شوې وه.
مدافع وکیل ویلي چې دغه کس د ادعا له مخې، د ګڼېګوڼې پرمهال په ډبرو لګېدلی او مړ شوی او کوم قصدي یا د هغې شخصي عمل نه و، خو محکمې پړه وپېژندله.
د ماهرنګ بلوڅ ترڅنګ د بلوڅانو د یووالي کمېټې ځينې نورو غړو صبغت الله شاه جي، د بلوڅ محصلانو ټولنې مشر بالاچ قادر او بل مشر ابوبکر کلانچي ته هم د عمري بند سزا اورول شوې ده.
د سیاسي چارو شنونکی شهسوار سنګروال وايي:« زه فکر کوم له یوې خوا پاکستان د بشري حقونو چغې وهي او له بلې خوا یوه ښځه په ډېرې بې رحمۍ سره بند خونې ته لېږي او ورته د عمري بند سزا ټاکي. دغه ډول کړنې د پاکستان هغه اصلي څېره نه یوازې د پاکستان خلکو ته بلکې سیمې او نړۍ ته ښکاره کوي چې پاکستان یو بې رحمه هېواد دی.»
ډاکټره ماهرنګ بلوڅ د بلوڅانو د حقونو مدافع ده او له اوږدې مودې راهیسې یې په بېلابېلو بڼو له بلوڅانو سره د پاکستان حکومت د چلن پر ضد اعتراضونه او احتجاجونه کړي دي.
د ماهرنګ بلوڅ نوم تر نیول کېدو څو ورځې وړاندې د نوبل سولې جایزې ته د نوماندانو په نوملړ کې هم شامل شوی و.
