په داسې حال کې چې د هرمز تنګي کلابندي د ایران او امریکا له خوا دوام لري او لا هم دواړه خواوې پر یو بل بریدونه کوي، تهران ویلي چې په سیمه کې د جګړې پای ته رسولو لپاره یې د واشنګټن د طرحی ځواب پاکستان ته سپارلی.
د تهران له خوا دا ځواب داسې مهال ورکړل شوی چې په وروستیو اوونیو کې د متحده ایالتونو او ایران ترمنځ خبرې په ټپه درېدلې دي، خو په فارس خلیج کې د خال خال نښتو سربېره، ماتېدونکی اوربند لا هم ټینګ دی.
د امریکا متحده ایالتونو رسنیو د ایراني سرچینو په حواله په یوه راپور کې ویلي، د امریکا د طرحې په اړه د تهران ځواب په تړاو ډېر لږ جزییات خپاره شوي.
د نیویارک ټایمز ورځپاڼې د راپور یوه برخه کې راغلي: « د روان جنګ د پای ته رسولو لپاره د امریکا طرحې ته د تهران ځواب په اړه ډېر لږ جزییات خپاره شوي. راپور کې ویل شوي چې له امریکا سره د خبرو اوسني پړاو تمرکز د روانې شخړې د پای په اړه دی. ایراني چارواکو ویلي، ایران او متحده ایالات اوس مهال د راتلونکو ۳۰ ورځو لپاره د جګړې د پای ته رسولو او د هرمز تنګي د پرانستلو په اړه دی چې د ایران له خوا بند کړای شوی. په دې ۳۰ ورځو کې به امریکايي او ایراني چارواکي د یوه جامع تړون یا موافقې د ترلاسه کولو لپاره کار وکړي.»
د تهران د ځواب په اړه نور جزییات لا نه دي خپاره شوي او نه هم سپینې ماڼۍ تر اوسه په دې اړه کومه تبصره کړې ده.
بله خوا، پرون د قطر لومړي وزیر شیخ محمد بن عبدالرحمن الثاني د متحده ایالتونو په میامي ایالت کې د امریکا د بهرنیو چارو له وزیر مارکو روبیو سره په لیدنه کې په دې ټینګار وکړ چې په خلیج کې د بحران ریښې باید په سوله ییز ډول د خبرو له لارې له منځه یوړل شي.
د قطر له خوا په خپاره شوي بیان کې ویل شوي چې په دې لیدنه کې دواړو خواو په سیمه کې د روان تاوتریخوالي د کمولو، امنیت او ثبات د بیا ټینګولو لپاره د پاکستان په منځګړیتوب خبرې وکړې.
خو د متحده ایالتونو د سولې طرحې په اړه دا پرمختګ داسې مهال رامنځته شوی چې په سیمه کې کړکېچ لا هم روان دی او دواړه خواوې د یو بل د اقداماتو پر وړاندې ګواښونه کوي.
د امریکا د سمندري ځواکونو له خوا د عمان په سمندر کې د یوې ایراني بېړۍ له هدف ګرځېدو وروسته د ایران د سپاه پاسداران انقلاب یو قومندان خبرداری ورکړی چې که د ایران کومه بېړۍ هدف وګرځول شي، نو په ځواب کې به یې په سیمه کې د امریکا پوځي اډې او بېړۍ په نښه شي.
دغه ایراني قومندان د ایران له مذهبي مشر سره تر لیدنې وروسته هغو هېوادونو ته چې د امریکا له خوا لګول شوي بندیزونه پلې کوي، خبر دار یې ورکړی چې د دوی بېړۍ به له هرمز تنګي څخه د تېرېدو پر مهال له ستونزو سره مخامخ شي.
د ایران د دولتي رسنیو د راپور یوه برخه کې راغلي: « د ایران د پوځ یوه جګپوړي جنرال هغو هېوادونو ته چې د متحده ایالاتو له خوا لګول شوي بندیزونه تطبیقوي، خبرداری یې ورکړی چې دوی به هله له ستونزو سره مخامخ شي چې د دوی بېړۍله هرمز تنګي څخه تېرېږي.»
د ایران له خوا له دې مخکې هم واشنګټن ته د سولې طرحه استول شوې وه چې د متحده ایالتونو د ولسمشر له خوا نا هیلې کوونکې بلل شوې وه، خو دا چې دا ځل به د سپینې ماڼۍ غبرګون څه ډول وي، دا به ډېر ژر څرګند شي.
د تهران او واشنګټن ترمنځ د خبرو لومړی پړاو تېره میاشت د اسلام اباد په منځګړیتوب په پاکستان کې ترسره شوې وې، خو کومې حتمي نتیجې ته له رسېدو پرته پای ته ورسېدې.
له هغې را وروسته د دویم پړاو خبرې بیا هم په اسلام اباد کې په پام کې نیول شوې وې، خو په پرله پسې ډول وځنډول شوې. د دې ځنډ یو اساسي علت د متحده ایالتونو د ولسمشر له خوا په بیا بیا بدلېدونکي بیانونه ښودل شوي دي.
