د ریاست الوزراء اقتصادي معاونت وايي، چې بین الوزارتي کمیټې د خپلو فعالیتونو له پیله تراوسه د ټول هېواد په کچه له ۳۵ میلیارد افغانیو څخه زیاته پانګهونه جذب کړې ده.
د اسلامي امارت مرستیال ویاند حمد الله فطرت وايي، چې دې کمیټې د خپل فعالیت په موده کې په بیلابیلو برخو کې او په تیره بیا د زیربناو، د برېښنا د بنسټونو، د هستوګنې او سوداګریزو ودانیو د جوړښتونو، کرنې، ټرانسپورټ او معلوماتي ټکنالوژۍ برخې په هر اړخیزه توګه څیړلي دي.
ښاغلی فطرت وايي، چې ددغو پانګه ونو جذب په زرګونو کسانو ته د کار زمینه برابره کړې ده.
د اسلامي امارت مرستیال ویاند، حمدالله فطرت په دې اړه وایي: «دغه طرحې په بېلابېلو ولایتونو کې تطبیق کېږي، چې ټولټال ارزښت یې ۳۵ میلیارده افغانیو ته رسېږي. د دغو طرحو په تطبیق سره په مستقیم او غیر مستقیم ډول زرګونه هېوادوالو ته کاري فرصتونه برابر شوي او دغه راز د کورنیو ساختماني توکو بازار ورسره غوړېدلی. کورني او بهرني پانګهوال کولی شي په افغانستان کې د پانګهونې له موجوده فرصتونو استفاده وکړي او خپلې طرحې د ریاست الوزراء د اقتصادي معاونیت تر چتر لاندې د پانګونې بین الوزارتي کمیټې ته وړاندې کړي.»
د ریاست الوزراء اقتصادي معاونیت لخوا د ورکړل شویو معلوماتو له مخې یاده کمیټه د دغه معاونیت په چوکاټ کې فعالیت کوي، چې اساسي موخه یی د پانګهونې جذب دی.
دا کمیټه د کورنیو او بهرنیو پانګهونو د جذب لپاره امکانات برابروي، د پانګهوالو او اړونده ادارو ترمنځ همغږي رامنځته کوي او په هېواد کې د اقتصادي ودې د ښه کولو لپاره فعالیت کوي.
د سوداګرۍ او پانګهونې خونې مسوولین وايي، چې دا پانګهونې د انرژۍ، په تېره بیا د لمر د انرژۍ، د اوبو د بندونو، چک ډیمونو، کوچنیو بندونو، د هستوګنی او سوداګریزو ودانیو، ټرانسپورټي زیربناو، هوايي پلونو او د ریل ګاډي پټلیو غځولو اړوند پروژو په برخو کې، چې د اسلام قلعه او اقینه بندرونو څخه افغانستان کې دننه غځیږي، شوي دي.
د مسوولینو په خبره، د کرنیزو محصولاتو لپاره د سړو خونو جوړول، د قوشتیپی پروژه او همدا راز د تازه میوو صادراتود پانګهونې د جذب امکانات برابر کړي او افغانستان پر ځان بسیا کیدو لور ته بیايي.
د سوداګرۍ او پانګهونې خونې د عامه اړیکو مسوول او ویاند وايي، جان اقا نوید وایي: «د افغانستان سوداګرنۍ خونې له نظره په کومو برخو کې چې پانګهونه شوې او کېږي په افتصادي برخه کې مهمې اغېزې لري؛ ځکه سلګونه کسانو ته د کار زمینه برابره شوې. دا پانګهونې د لمرېزې برېښنا، چک ډېمونو، کانونو ایستنې او ساختماني برخو کې شوې دي.»
یو شمیر اقتصادي شنونکي بیا په هېواد کې د بهرنیو پانګهونو د جذب لپاره د حکومت رول مهم بولي او د دې چارې لپاره د مالیاتو د معافیت په برخه کې د تخفیف په څېر ځانګړو پکیجونو ورکړه مهمه ګڼي.
د اقتصادي چارو شنونکی، نورالله عزیز وایي: « په اوسنیو شرایطو کې په ټولو سکټورونو کې پانګهونه مهمه ده که هغه د زراعت سکټور دی، که د صنعت سکټور دی، که د مخابراتو سکټور دی، که د خدماتو سکټور دی او یا هم د کانونو کیندنې او یا د انرژۍ تولید سکټور دی. مهمه ده چې اوسنی نظام وکولی شي په مختلفو برخو کې مختلف امکانات او اسانتېاوې رامنځته کړي. دا اسانتیاوې که د مالیاتو کمول وي، که د سهولتونو رامنځته کول او یا هم د پیسو لېږد پر وړاندې د بانکي ستونزو له منځته وړل وي.»
یو شمیر نور اقتصادي شنونکي بیا د اسلامي امارت اقتصاد محوره بهرنۍ پالیسي، د میلیاردونو افغانیو په ارزښت د پانګهونې جذب کې موثره بولي.
د اقتصادي چارو شنونکی، زلمی افغانیار په دې تړاو داسې نظر لري: «په تېرو څلورو کلونو کې افغان حکومت د خپلې په څو برخو کې حکتولي کړې مهمه ده چې په هېواد کې په میلیاردونو افغانۍ پانګونه کېږي او دا به ډېره ګټوره وي.
د شنونکو په وینا د انرژۍ، کرنې او ټکنالوژۍ په برخو کې د لسګونو میلیارډو افغانیو د پانګه ونې جذب دا ښيي، چط پر اقتصادي ودې او د کاري فرصتونو رامنځته کول په ټول جدیت سره تعقیبیږي.
خپور یې کړئ
