د جمعیت علمای اسلام ګوند مشر وایي، د پاکستان حکومت او پوځ د خپل بام واورې پر بام پرې اېښې دي او په ځای یې د نورو له بامونو واوري پاکوي.
مولانا فضلالرحمن ویلي، پاکستان که څه هم د ایران او امریکا ترمنځ د منځګړیتوب هڅې کوي، خو په خپله له جدي سیاسي او اقتصادي ستونزو سره مخ دی.
هغه په لاهور کې یوې غونډې ته دغه راز ویلي، پاکستان له هند او افغانستان سره ټولې سوداګریزې لارې تړلې دي او دې وضعیت د سوداګرۍ پر چارو منفي اغېز کړی او اقتصادي فشارونه یې زیات کړي دي.
د هغه په خبره، د دې ستونزو له امله نه یوازې اقتصادي وضعیت خراب شوی بلکې د چین په ګډون ځینې مهم شریکان هم ناخوښ دي او پانګونه یې کمه کړې ده.
مولانا فضلالرحمن وړاندې ویلي: « زه د پاکستان د پالیسیو له جوړونکو یو څو پوښتنې لرم؛ هغه کسان چې د هېواد بهرنۍ او کورنۍ پالیسۍ جوړوي. دوی ته باید وویل چې اوسمهال پاکستان له هند او افغانستان سره ټولې لارې تړلې دي. تاسو پوهېږئ چې پاکستان یوازې همدا دوې سوداګریزې لارې لري او موږ دغه دواړه تړلې دي. چین له موږ خفه دی او دلته له پانګونې څخه منډې وهي او له ایران سره مو اړېکې لا معلومې نهدي. اوس تاسې ووایاست چې پاکستان او اقتصادي وضعیت یې کومې خواته روان دي؟»
مولانا فضلالرحمن د اقتصادي راتلونکي په اړه اندېښنه څرګنده کړې او وايي، خلک له لوړو بیو سره مخ دي او د هرمز تنګي د وضعیت له امله د سون توکو بیې هم ناڅاپي لوړې شوې دي.
هغه زیاته کړې، که څه هم د ګرانۍ په ضد اعلان شوي لاریونونه ځنډول شوي، خو لغوه شوي نه دي او ښايي بیا پیل شي.
فضلالرحمن د پاکستان له حکومت غوښتي چې د سیاسي او اداري اصلاحاتو لپاره جدي ګامونه پورته کړي؛ ځکه د هغه په باور اوسنی وضعیت د پالیسۍ کمزوري ښيي.
پخوانی ډېپلومات عزیز معارج وايي: « که څه هم ښايي د فضل الرحمن د دې خبرو تر شا نورې موخې هم وي، خو بیا هم خبرې یې واقعیت دي. د پاکستان حکومت باید لومړی خپلې ستونزې حل کړي، له ګاونډیانو سره دې شته ستونزې هوارې کړي او بیا دې د نړۍ فیصلې کوي.»
د چارو څارونکي بیا وایي، پاکستان د امریکا په اشارې غواړي چې له ایران سره د خبرو او سیاسي ډیالوګ زمینه برابره کړې.
د دوی په خبره، دا هېواد تل په سیمه کې د امریکایي ګټو او اشارو لپاره هڅې او زمینې برابروي.
د سیاسي چارو شنونکی ډاکټر معین ګل څمکنی وايي: « د ایران او امریکا ترمنځ د خبرو کوربه توب د پاکستاني حکومت کوم ځانګړی نوښت نه دی بلکې دا د امریکا غوښتنه ده. امریکا غواړي ایران د پاکستان په وسیله بوخت وساتي او دوی د جګړې لپاره اکمالات وکړي او بېرته جګړه پيل کړي.»
د جمعیت علمای اسلام ګوند مشر مولانا فضلالرحمن داسې مهال په خپل هېواد کې د سیاسي او اقتصادي ستونزو په تړاو غږ پورته کوي چې دا هېواد له وروستیو څو کلونو راهیسې له سیاسي، اقتصادي او امنیتي پلوه وضعیت له سختو ننګونو سره مخ دی.
په پاکستان کې ولسي خلک او سیاسي ګوندونه د دې وضعیت اصلي لامل هلته حاکم سیاسي قشر او پوځ بولي.
