د امریکا ولسمشر ډونالډ ټرمپ یو ځل بیا ویلي چې له ایران سره خبرې په ښه ډول روانې دي او نږدې ده چې یوې هوکړې ته سره ورسېږي.
ټرمپ خبرداری هم ورکړی چې که دا خبرې بریالۍ نه شوې، د ایران د انرژۍ پر تاسیساتو به بریدونه پیل کړي.
ډونالډ ټرمپ زیاته کړې: « له ایران سره مو خبرې ډېرې ښې روانې دي او نور نو نږدې شوي یو چې یوې هوکړې ته سره ورسېږو. خو تاسو په یاد ولرئ که دا خبرې بریالۍ نه شي یا پر یوې هوکړې بدلې نهشوې، نو به وګورئ چې موږ څنګه د ایران د انرژۍ پر تاسیساتو بریدونو کوو.»
د امریکا ولسمشر دغهراز په یوه بل پیغام کې چې دوی له نوي او زیات معقول ایراني رژیم سره په جدي خبرو کې دي، خو د انرژۍ پر بنسټونو يې د برید ګواښونه بیا تکراروي.
ټرمپ ویلي، متحده ایالتونه له یوه نوي ایراني رژیم سره جدي خبرې کوي او ښايي له امله یې په ایران کې د امریکا پوځي عملیات پای ته ورسېږي.
ډونالډ ټرمپ په دې اړه ویلي: « مهم پرمختګ شوی، خو که د کوم دلیل له مخې ژر تړون و نه شي چې ښایي وشي او که د هرمز تنګي سملاسي د سوداګرۍ لپاره نه پرانستل کېږي، نو موږ به په ایران کې خپل ښکلی حضور داسې پای ته ورسوو چې د هغوی ټول د برېښنا تولیدوونکي مرکزونه، د تېلو څاګانې او د خارګ ټاپو او ښایي د مالګینو اوبو پاکولو ټول کارځایونه هم په بشپړه توګه له منځه یوسو چې تر اوسه مو په قصدي ډول نه دي لمس کړي.»
بله خوا، ایران له امریکا سره هر ډول خبرې اترې رد کړې دي او وايي، د یرغل پر مهال د خبرو په ځای د خپلې خاورې او خلکو دفاع ورته لومړیتوب لري. د بهرنیو چارو وزارت يې ویلي، له امریکایي لوري سره یې په تېرو ۳۱ ورځو کې هېڅ ډول خبرې نهدي کړې.
د ایران بهرنیو چارو وزارت ویاند اسماعیل بقایي زیاته کړې: « زموږ دریځ خورا روښانه دی. اوس په داسې حالت کې چې د امریکا پوځي یرغل په شدت سره دوام لري، موږ ټول هڅه کوو او خپل ټول ځواک د ایراني ملت دفاع کوي. موږ د خپلو غوښو او وینو تجربې په ياد لرو او موږ به هغه خیانت هېر نه کړو چې د ډېپلوماسۍ پر وړاندې په یوه کال کې دوه ځله ترسره شو.»
دا په داسې حال کې ده چې د سپینې ماڼۍ وياندې کارولین لیویټ ويلي، د امریکا او ایران ترمنځ خبرې اترې ښې روانې دي او دوام لري.
نوموړې زياته کړې، هغه ایراني چارواکي چې امریکا ورسره خبرې کوي، د پخوانیو مشرانو په پرتله د پردې تر شا ډېر منطقي ښکاري.
