په داسې حال کې چې جګړه په ټول شدت روانه ده او دواړه خواوې یو پر بل بریدونه کوي، د امریکا ولسمشر ادعا کړې چې په ایران کې یې واکمن نظام پرځولی.
ډونالډ ټرمپ د تېرو څرګندونو خلاف چې ویل یې، په ایران کې د رژیم نسکورولو په لټه کې نه دی، دا ځل له خبریالانو سره په خبرو کې د رژیم له منځه وړل مهم یاد کړي او د ایران مذهبي مشر له منځه وړل او پر جګړې سربېره یې د مذاکراتو احتمال په اټوماتیکه توګه د رژیم له منځه تلو په مانا بللی.
ټرمپ ویلي، باور لري چې مقابل لوري سره معاملې ته رسېدلی خو دا امکان هم نه ردوي چې مذاکرات او خبرې به هېڅ ترسره نه شي.
د امریکا ولسمشر ډونالډ ټرمپ ویلي: « زه فکر کوم او په دې باور یم چې موږ له هغوی سره معاملې ته رسېدلي یو؛ خو دا هم ممکنه ده چې دا څه ترسره نه شي. په ایران کې وار دمخه رژیم بدل شوی؛ ځکه د رژیم ډېره برخه نړېدلې او له منځه تللې، هغوی ټول مړه شوي دي. دویم رژیم هم نږدې ټول له منځه تللی، خو له درېیم رژیم سره موږ له داسې کسانو سره پر خبرو بوخت یو چې په تېر کې مو هېڅکله ورسره خبرې نه دي کړې.»
نوموړي له فایننشل ټایمز ورځپاڼې سره په مرکه کې زیاته کړې، کولی شي د ایران د تېلو ټولې زېرمې په لاس کې واخلي او ان د خارک ټاپو هم ونیسي.
د ټرمپ دې خبرې هغه احتمال هم پر واقعیت بدلېدو ته نږدې کړی چې ویل کېږي امریکا له څو ورځو راهیسې پر ایران ځمکني برید ته چمتووالی نیسي.
په داسې حال کې چې د هوايي ځواکونه شاوخوا دوه زره سرتېري یې د پنټاګون په امر وار دمخه منځني ختیځ ته رسېدلي.
ایراني لوري امریکا له دې هېواد سره پر دوه مخي سیاست کولو تورنه کړې. د دوی په خبره، امریکا له یوې خوا د مذاکراتو او ډیالوګ خبرې کوي، خو له بلې خوا بیا پر ایران د ځمکني برید پلان ترتیبوي.
د ایران د پارلمان رییس محمد باقر قالیباف دې ګواښ ته په غبرګون کې ویلي، ایراني پوځ د امریکايي ځواکونو په تمه دی، ترڅو هغوی او سیمهییزو ملاتړو ته یې بې ساری او غاښ ماتوونکی ځواب ورکړي.
قالیباف زیاته کړې: « دښمن که له یوې خوا له ورایه د مذاکراتو او ډیالوګ خبره کوي، له بلې خوا په پټه او د پردې تر شا د ځمکې له لارې د برید په پلان جوړولو بوخت دي.»
بله خوا، د روانې جګړې درولو او د مذاکراتو د پیل په موخه په پاکستان کې د ترکیې، سعودي عربستان او مصر د بهرنیو چارو وزیرانو ګډه څلور اړخیزه ناسته هم يکشنبه د شپې پای ته ورسېده. په دې ناسته کې پر دایمي اوربند، د جګړې پر زیانونو او پایلو او د ښکېلو لورو ترمنځ د خبرو او مذاکراتو پر پیل همغږي ښودل شوې.
د پاکستان بهرنیو چارو وزارت دا ناسته ګټوره بللې او د وضعیت پر کنټرولېدو یې ټینګار کړی.
د پاکستان بهرنیو چارو وزارت ویلي: « بهرنیو چارو وزيرانو په یوه خوله پر دې ټینګار وکړ چې وضعیت کنټرول کړي، د پوځي ښکېلتیا د پراخېدو مخنیوی وکړي او د ښکېلو خواوو ترمنځ ډیالوګ او مذاکراتو ته وړ فضا رامنځته کړي.»
دا داسې مهال ده چې امریکا او اسراییل تازه په ګډه د ایران د برېښنا پر تاسیساتو بریدونه کړي چې له امله یې د پلازمېنې تهران او ګڼو نورو برخو برېښنا پرې شوې. ایران يې بیا په ځواب کې پر کوېټ او سعودي عربستان کې د امریکا پر اهدافو توغندیز بریدونه کړي.
د فبرورۍ په ۲۸مه د روانې جګړې له پیلېدو سره سم د بریدونو له کبله د ایراني لوري د مرګ ژوبلې رسمي ارقام نږدې ۳۰ زرو تنو ته رسېدلی.
په داسې حال کې چې امریکا په دې جګړه کې د ۱۳پوځیانو د وژل کېدو او د شاوخوا ۲۰۰ تنو د ټپي کېدو خبر تایید کړی او اسراییلو ته هم ګڼ ځاني تلفات اوښتي.
