له اوزبېکستان څخه د یوه دولتي پلاوي په ترکيب کې شاوخوا ۴۰ سوداګر کابل ته راغلي او دلته يې له افغان سوداګرو سره په بېلابېلو برخو کې ۲۵ تړونونه لاسلیک کړل.
چارواکي وایي، دغه تړونونه به وکولی شي د دواړو ګاونډیو هېوادونو ترمنځ اقتصادي او سیاسي اړیکې نورې هم پیاوړې کړي.
دوی سوداګرو ته د حکومت له اړخه د بشپړې همکارۍ ډاډ ورکوي، خو له افغان سوداګرو غواړي چې د وارداتو ترڅنګ ازبېکستان ته صادرات هم وکړي.
د صنعت او سوداګرۍ وزیر نورالدین عزیزي وايي: « موږ له خصوصي سکټور هیله لرو چې د صادراتو په تړاو هم ځینې مسایل په پام کې ونیسي. زموږ اکثریت صادرات خام مواد دي او موږ کولی شو د ازبېکستان په فابریکو کې یې پروسېس کړو. زموږ د معلوماتو له مخې، افغانستان سږ کال شاوخوا نیم میلیون ټن پنبه تولید کړې ده.»
نوموړی باوري دی چې په افغانستان کې د ازبېکستاني پانګوالو له لوري په پانګونې سره به خلکو ته په کور دننه کاري فرصتونه هم رامنځته شي.
بله خوا، خصوصي سکټور په تاشکند کې د افغاني محصولاتو وروستی جوړ شوی نندارتون له لاسته راوړنو ډک بولي او زياتوي، د دې نندارتون په پایله کې په ډاګه شوې چې افغاني توکي په ازبېکستان کې د پلور ښه بازار لري.
د سوداګرۍ او پانګونې خونې رییس سیدکریم هاشمي وايي: « لکه څرنګه چې تاسو ته معلومه ده، د افغانستان د سوداګرۍ او پانګونې خونې څلور ورځې وړاندې «د افغانستان جوړ» په نوم لومړنی نندارتون د ازبېکستان په تاشکند ښار کې جوړ کړ. په دې نندارتون کې د افغانستان مختلف تولیدات او محصولات لکه وچې او تازه مېوې، غالۍ، پنبه، ګران بیه او نیمه ګران بیه ډبرې، زعفران او نور توکي د درېیو ورځو لپاره نندارې ته وړاندې شول. نندارتون زموږ لپاره د پام وړ پایلې لرلې او د انتقال شویو توکو له ډلې د ۹۵ سلنو له فروش سربېره، سلګونه شرکتونو او زرګونه کسانو ترې لیدنه هم وکړه.»
په ورته مهال، ازبېکستاني چارواکي وايي، سوداګر يې چمتو دي چې د افغانستان په بېلابېلو سکټورونو کې پانګونې وکړي. دوی ډاډ ورکوي چې افغانستان ته به نه يوازې صادرات وکړي بلکې پر دې سربېره به ترې واردات هم ولري.
د ازبېکستان د نمنګان والي شوکت عبدالرزاقوف وايي: « د دې غونډې اصلي هدف د نامنګان سوداګرو او افغان کاروباریانو ترمنځ مستقیمې اړیکې ټینګول او د سوداګریز تبادلې د حجم زیاتوالی دی. موږ نه یوازې د تیارو محصولاتو د صادارت چمتوالی لرو بلکې ستاسو په هېواد کې د ګډو فابریکو د جوړولو، د کاري فرصتونو رامنځته کولو او د تجربو شریکولو لپاره هم چمتوالی لرو.»
په دې ګډه ناسته کې د افغان او ازبېکستانې سوداګرو ترمنځ په بېلابېلو برخو کې د شاوخوا ۵۱۴ میلیون ډالرو په ارزښت د راکړه ورکړې تړونونه لاسلیک شول چې پر بنسټ به يې د ۱۷۰ میلیون ډالرو په ارزښت له افغانستان څخه صادرات او پاتې نور به له اوزبېکستان څخه افغانستان ته واردات کېږي.
د سوداګرۍ او پانګونې خونې د چارواکو په خبره، اوبېکستاني چارواکو ورسره ژمنه کړې چې۴۰ افغان پانګوالو ته به یو کلنې وېزې ورکوي او دغه راز به افغان سوداګرو ته په بندرونو کې ګڼې اسانتياوې ورته برابرې کړي.
