د امریکا متحده ایالتونو ولسمشر ډونالډ ټرمپ وايي، د جنګ وزارت ته يې لارښوونه کړې چې د پنځو ورځو لپاره د ایران انرژۍ پر تاسیساتو له هر ډول برید ډډه وکړي.
تر دې مخکې ډونالډ ټرمپ د هرمز تنګي د بېرته خلاصولو لپاره تهران ته ۴۸ ساعته ضرب الاجل ټاکلی و چې د دوشنبې ورځې په پای ته رسېدو سره، پای ته ورسېد.
ډونالډ ټرمپ د خپلې خواله رسنۍ پر پاڼه په غټو ټکو سره لیکلي چې دا پرېکړه یې له ایران سره د ژورو او رغنده خبرو له ترسره کولو وروسته کړې.
د متحده ایالتونو ولسمشر زیاته کړې: « زه خوشاله یم چې تاسو ته دا راپور در کوم چې متحده ایالاتو او ایران په تېرو ۲ ورځو کې په منځني ختیځ کې د خپلې دښمنۍ پای ته رسولو لپاره ډېرې ښه او رغنده خبرې کړې دي. د دې خبرو د پایلو په رڼا کې مې چې د اوونۍ په اوږدو کې دوام ومومي، ما د جنګ وزارت ته لارښوونه وکړه چې د پنځو ورځو لپاره د ایران انرژۍ په تاسیساتو هر ډول بریدونه وځنډوي. دا کار البته د روانو لیدنو کتنو او خبرو د بریا لپاره شوی دی.»
تر دې مخکې ټرمپ ګواښ کړی و چې د هرمز تنګي د پرانستلو لپاره ایران ته د ورکړل شوي ضرب الاجل له پای ته رسېدو سره به د ایران د انرژۍ تاسیسات په نښه او له منځه یوسي.
د ټرمپ له دې خبرداري وروسته د ایران انقلابي ګارد(سپاه) هم خبرداری ورکړی چې که د ایران د برېښنا تاسیسات په نښه شي، دوی به سیمه او اسراییلو کې د انرژۍ او څښاک اوبو تاسیسات له منځه یوسي.
ټرمپ دا هم ویلي وو چې له ایران سره د روانې جګړې بندولو ته لېواله نه دی.
ډونالډ پرمپ په دې اړه ویلي: «موږ ممکن په خپلو کې خبرې ولرو، خو زه له ایران سره د اوربند غوښتونکی نه یم.»
بله خوا، د ایران بهرنیو چارو وزارت د ټرمپ څرګندونو ته غبرګون ښودلی او ویلي یې دي چې د واشنګټن او تهران ترمنځ هېڅ ډول خبرې نه دي شوې.
د امریکا سياېناېن ټلویزیون په دې اړه د راپور په خپرولو سره ویلي، له تېرو څو ورځو راهیسې د تهران او واشنګټن ترمنځ د څو هېوادونو له خوا پیغامونه تبادله شوي دي.
دا وروستی پرمختګ داسې مهال رامنځته شوی چې پر ایران د امریکا او اسراییلو د جګړې له پیل راهیسې په ایران او لبنان کې زرګونو کسان وژل شوي دي.
د ایراني رسنیو د راپورونو له مخې، پر تهران د اسراییلو هوایي بریدونو په وروستۍ څپه کې څو بېلابېلې سیمې په نښه شوې دي.
همدارنګه، د ټرمپ له دې اعلان وروسته په نړیوالو مارکېټونو کې د تېلو بیې هم را ولوېدې او د هر بېلر تېلو بیه له ۹۹ ډالرو څخه را ښکته شوه.
