د امریکا، اسراییلو او ایران له جګړې سره هممهاله، د امریکا ولسمشر خبرداری ورکړی چې که یې متحدین د هرمز تنګي په پرانستلو کې ورسره مرسته ونهکړي، ښایي د ناټو لپاره ډېرې ناوړه پایلې ولري.
ډونالډ ټرمپ فاينشیل ټايمز ورځپاڼې ته ويلي، ټول هغه هېوادونه چې له هرمز تنګي ګټه اخلي، باید په بیا پرانستلو کې یې مرستې ته راودانګي.
ټرمپ پر ټولې اروپا او ان پر چین غږ کړی چې د هرمز تنګي د پرانستلو په برخه کې جدي ګامونه پورته کړي.
د امریکا ولسمشر ویلي: « بالکل روښانه ده، هغه هېوادونه چې له هرمز تنګي ګټه اخلي، باید د بيا پرانستلو په هڅو کې یې مرسته وکړي. اروپا او چين په پراخه کچه هغو تېلو پورې تړلي چې د خليج له سيمې راځي. که د نورو هېوادونو له خوا هېڅ غبرګون ښکاره نهشي، نو دا به د ناټو راتلونکي لپاره ډېر ناوړه وي. امریکا له خپلو متحدينو سره ډېر مهربانه چلن کړی او اوس دوی باید ورته ګام پورته کړي.»
بله خوا، ایران یو ځل بیا ګواښ کړی چې له امریکا سره به تر هغو جګړه وغځوي چې د دې هېواد ولسمشر ډونالډ ټرمپ پر خپلو کړنو پښېمانه نهشي. بهرنیو چارو وزیر يې ویلي، د امریکا ولسمشر باید ومني چې پر ایران برید یوه لویه تېروتنه وه.
د ایران بهرنیو چارو وزیر سیدعباس عراقچي ویلي: « زموږ ځواکمن وسلهوال ځواکونه به تر هغې بریدونو ته دوام ورکړي چې د امریکا ولسمشر ډونالډ ټرمپ دا درک کړې نهوي چې دا ناقانونه جګړه چې پر ایران او امریکا ولسي خلکو ور تپل شوې ده، یوه لویه تېروتنه وه. ډونالډ ټرمپ باید خپله تېروتنه ومني، ترڅو بیا ورته تېر وتنې تکرار نه شي. هغه باید د دې جګړې قربانیانو ته هم حساب او تاوان ورکړي.»
د امریکا ولسمشر له ایران سره د تودې جګړې پر مهال په یو شمېر امریکایي رسنیو هم سختې نیوکې کړې.
ټرمپ پر ځینو امریکایي رسنیو تور پورې کړی چې د ایران جګړه ییزو تبلیغاتو ته هوا ورکوي او دا څه یې له خپل هېواد سره ښکاره خیانت بللی.
ټرمپ وایي، له دې ډول رسنیو سره به جدي او قانوني چلن وشي، ترڅو دا ډول تېروتنې بیا تکرار نهشي.
د امریکا ولسمشر ډونالډ ټرمپ ویلي: « حقیقت دا دی چې ایران سخت ځپل شوی او لا یې د ځپلو لړۍ روانه ده، خو دوی په درواغو او جعلي خبرونو هر څه بریالي روان کړي دي. هغوی د مصنوعي ځیرکتیا له لارې خپرونې کوي، خو یو شمېر فاسدې رسنۍ ورته تیارې ناستې دي او دا څه په ډېرې بېشرمۍ خپروي. دا رسنۍ امریکا له وړیا څپو څخه د میلیاردونو ډالرو په ارزښت ګټه اخلي، خو له دې سره دوی د امریکا پر ضد خپرونې کوي.»
د امریکا ولسمشر همدارنګه د اوکراین جګړې ته هم په اشارې ویلي، نور اړتیا نهویني چې د دې هېواد لاسنیوی وکړي. د هغه په خبره، امریکا له اوکراین سره د جګړې پر مهال ودرېده، خو اوس چې دوی خپله په جګړه کې ښکیل دي، له کیف ورته هیله او تمه نه لري.
د امریکا ولسمشر په دې اړه ویلي: « موږ مجبور نه وو چې له اوکراين سره مرسته وکړو. اوکراين له موږ څخه زرګونه کيلومټره لرې دی، خو بيا هم موږ ورسره مرسته وکړه. اوس به وګورو چې دوی له موږ سره مرسته کوي که نه؟ ځکه ما وړاندې ويلي و چې موږ له دغو هېوادونو سره درېږو، خو هغوی به زموږ سره ونه درېږي او زه ډاډه نه یم چې دوی به زموږ ترڅنګ ودرېږي.»
ټرمپ دغه څرګندونې يوه ورځ وروسته له هغې کړې چې له چين، فرانسې، جاپان، جنوبي کوريا او بریټانیا یې د هرمز تنګي د پرانستلو لپاره په ګډو هڅو کې د ګډون غوښتنه کړې وه.
هرمز تنګی په نړۍ کې د نفتو د ټرانزیټ تر ټولو بوخته سمندري لاره ده او د نړۍ نږدې۲۰ سلنه نفت له همدې لارې تېرېږي.
