د امریکا، اسراییلو او ایران جګړه ۱۳ مې ورځې ته ننوته او لاهم دواړه لوري پر یو بل بریدونو ته ادامه ورکوي. د امريکا د جنګ وزير تازه ویلي، سېشنبه او چهارشنبه یې د شپې له مخې پر ایران تر ټولو سخت ویجاړونکي بریدونه کړي.
نوموړي زیاته کړې، دغه بريدونو د کره معلوماتو پر بنسټ ترسره شوي او د پرمختللیو جنګي الوتکو په کارولو سره يې په کې د ايران حساس ځايونه بمبار کړي.
پیټ هېکسټ زیاته کړې: « نن یو ځل بیا په ایران کې د هوايي بریدونو سخته ورځ وه. په دې ورځ د نورو وختونو په پرتله، د پرمختللیو استخباراتي معلوماتو پر بنسټ تر ټولو زیاتو جنګي الوتکو په کې برخه اخستې وه او تر ټولو زیاتې بمبارۍ په کې شوې دي.»
رویټرز خبري اژانس د پنټاګون له قوله ویلي، پر ایران د امریکا او اسراییلو په جګړه کې د ۸ امریکايي پوځيانو د وژل کېدو او شاوخوا ۱۰۸ نورو د ټپي کېدو خبرونه تایید شوي، خو یو شمېر نورو امریکايي رسنیو بیا د ټپي شویو امریکايي پوځيانو شمېر شاوخوا ۱۵۰تنه ياد کړی.
له دې سره هممهاله، د ایران ولسمشر د زبرځواکو له خوا پر ایران پخوانیو جګړو ته په اشارې ویلي، یرغل کوونکي به له ماتې سره مخ شي او له هغه څه به یې پېښمانه کړي چې فکر یې کوي.
د ایران ولسمشر مسعود پزشکیان ویلي: « ایران ۶ زره کاله د تمدنونو وارث دی. د تاریخ په لوړو ژورو کې هېڅ ځواک نه دی توانېدلی چې دا ستر نوم له منځه یوسي او هغه څوک چې ټیټ فکر کوي، نو د ایران له تاریخ څخه يې څه نه دي زدهکړي. ویجاړونکي راغلي او بېرته تللي، خو ایران پاتې دی.»
د مسعود پزشکیان ترڅنګ د ایران ملي امنیت عالي شورا منشي بیا د زور له لارې د امریکا غوښتنو تحمیل ته په غبرګون کې خبرداری ورکړی چې تهران به هېڅکله هغه غوښتنې ونه مني چې ملي حاکمیت او استقلال ته یې په کې خطر متوجه وي.
نوموړي د هرمز تنګي په اړه چې د نړيوالې انرژۍ د ټرانزيټ مهمه سمندري لار ده، د ټرمپ ګواښونو ته په غبرګون کې ویلي، دا تنګی به پر ايران د بريدونو تر دوامه تړلی وساتي.
علي لاریجاني ویلي: « د هرمز تنګی به یا د سولې او سوکالۍ په موخه د ټولو لپاره پرانستی وي او یا به د جنګ غوښتونکو پرمخ تړلی وي.»
د ایران دولتي رسنیو د راپورونو پر بنسټ، د فيبروري له ۲۸مې راهیسې چې امریکا او اسراییلو پر ایران ناببره هوايي بریدونه پیل کړل، تر اوسه نږدې ۱۰ زره ملکي اهداف په نښه شوي او له ۱۳سوو زیاتو ملکیانو په کې ژوند بایللی او زرګونه نور ټپیان شوي دي.
د دې ترڅنګ، اسراییلي چارواکو ویلي، د ایران په توغندیزو بریدونو کې تر دې دمه ۱۳ کسان وژل شوي او څه باندې ۵۰۰ نور ټپیان شوي دي.
