رویټرز په یوه څېړنیز راپور کې موندلې چې د امریکا کډوالۍ برخې چارواکو د تاوتریخوالي د هغو شپږو پېښو په اړه ناسم معلومات ورکړي چې له یوې میاشتې راهیسې په دې هېواد کې پېښې شوې دي.
په راپور کې راغلي، د ټرمپ ادارې له حقایقو وړاندې د ښکېلو امنیتي کارکوونکو دفاع کړې او یو شمېر په نښه شوي ملکي وګړي یې پر ترهګرۍ تورن کړي.
رویټرز د خپلو معلوماتو له مخې زیاته کړې، په مینیا پولیس ښار کې د کډوالۍ فډرالې ادارې امنیتي ځواکونو له خوا د ریني نیکول ګوډ او الېکس پرېټي ملکي وګړو د وژنو پرمهال ثبت شوې ویډیوګانې او راټول شوي معلومات دا ښکاره کوي چې دا کسان په کوم جرم کې له ښکېلتیا پرته په نښه شوي.
د رویټرز راپور په یوه برخه کې راغلي: « د کډوالۍ فډرالي ادارې له خوا په مینیا پولیس ښار کې د حقایقو له څېړنې وړاندې د وروستیو تاوتریخوالو په اړه وضاحتونه دا څرګندوي چې د دې ادارې پر پلټنو باور را کم شي او هغه شکونه او پوښتنې هم رامنځته کړي چې په رښتیا هم دوی د واقعیتونو پلټنه کوي که نه؟»
په دې موندنو کې د تاوتریخوالي وروستي پېښه هغه مهال رامنځته شوه چې د الېکس پرېټي په نوم یو نرس د د کډوالۍ فډرالې اداري امنیتي ځواکونو د روانې اوونۍ په یکشنبې ورځ په مینیا پولیس ښار کې د وسلې لرلو په تور وواژه، خو په خپرو شویو ویډیوګانو کې له نوموړي سره د وسلې پرځای یوازې ځیرک مبایل لیدل کېږي.
د ډونالډ ټرمپ د لومړۍ واکمنۍ پر مهال د دې هېواد کورني امنیت وزارت ویاند له رویټرز سره په همدې خپور شوي راپور کې منلې چې د ټرمپ اداره د حقایقو پر وړاندې بې پروايي ساتي او هڅه کوي وضعیت د خپلو غوښتنو پر بنسټ کنټرول کړي.
د امریکا کورني امنیت وزارت پخوانی ویاند ډېویډ لاین رویټرز ته ویلي: « دوی له لومړیو د کیسې د کنټرول هڅه کوي، خو کله چې ناسم ثابت شي، د حقایقو پروا نه ساتي.»
د راپورونو له مخې، له دې پېښو سره سم چې لا یې د څېړنو په اړه وروستي جزییات نه دي په ډاګه شوي، د میني سوټا ایالت په یوې ولسي ناسته کې د دې هېواد د کانګرېس ډیموکراټ ګوند استازې الهان عمر پرمخ د یو کس له لوري بدبویه مواد شیندل شوي.
راپورونه څرګندوي، دا پېښه وروسته له هغې رامنځته شوې چې نوموړې د خبرو پرمهال د امریکا کورني امنیت د وزیرې کرېسټي نوم د استعفا او استیضاح غوښتنه وکړه او هم یې په میني سوټا کې د کډوالۍ پر وړاندې د فډرالي ادارې روان پوځي عملیات وغندل.
د کانګرېس ډیموکراټ ګوند استازې الهان عمر ویلي: « د ټرمپ نږدې متحده او د کورني امنیت وزیره کرېسټي نوم باید استعفا ورکړي او یا استیضاح سره مخ شي.»
په متحده ایالاتو کې د کډوالو پر وړاندې د ټرمپ ادارې سختو پالیسو تعقیب، د دې هېواد د سیاسي ګوندونو او ایالتي چارواکو له خوا له جدي مخالفتونو سره مخ شوي، خو د سپینې ماڼۍ مسوولین او د کډوالۍ فډرالي ادارې چارواکي دا بهیر د متحده ایالاتو ثبات ته مهمه اړتیا ګڼي. رویټرز ته د دې هېواد کورني امنیت وزارت مسوولینو د ټولو تاوتریخوالو پړه پر هغو کسانو اچولې چې د دې پېښو پر وړاندې یې د ټرمپ ادارې له فعالیتونو سره مخالفت ښودلی.
د کورني امنیت وزارت ویاندې ټرېشیا مک لافلن ویلي: « موږ د لوړې کچې همغږی کوونکی کمپاین ګورو چې د پلي کوونکو پر وړاندې روان دی او موږ به امریکایانو ته د پېښو دقیق معلومات ورکړو.»
د راپورونو له مخې، د امریکا میني سوټا، شیکاګو او تکزاس ایالتي محکمو د کډوالۍ فډرالي ادارې د امنیتي ځواکونو له خوا د دغو پېښو څېړنې پیل کړې دي او تر ډېره یې هغه معلومات ناسم یاد کړي چې د ټرمپ ادارې له خوا وړاندې شوي.
