د پاکستان حکومت مخالفو ګوندونو اتحاد( تحریک تحفظ آیین پاکستان)، د دوشنبې په ورځ د یوې ناستې پرمهال په ټول پاکستان کې د پراخو احتجاجونو پیلولو پرېکړه کړې.
د اپوزیسیون مشر وايي، د را روانې فبروري میاشتې په اتمه به د حکومت ټول مخالف ګوندونه تر خپل نفوذ لاندې سیمو کې پراخ کاربندیز پیل کړي، ورځنۍ راکړه ورکړې به ودروي او ټرانسپورټي خدمات به وځنډوي.
اپوزیسیون د ۲۰۲۴زېږدیز کال د فبروري اتمه ځکه د پاکستانیانو لپاره توره ورځ بللې چې په خبره یې په کې د شاوخوا پنځوس میلیونه وګړو پر رایو ملنډې ووهل شوې او د ټاکنو په پایلو کې د لاسوهنې له امله، پر درغلیو راغلی حکومت واکمن شو.
د اپوزیسیون مشر محمودخان اڅکزی وايي: « له تاسو ټولو غواړو چې د را روانې فبروري په اتمه په پوره ارادې او ځواک سره له شمال نیولې تر سوېل او له ختیځ تر لوېدیځه په ټول پاکستان کې سره یوځای شئ، لاسونه سره ورکړئ او دا شعار بدرګه کړئ چې موږ د ظلمونو کړۍ ماتولو پسې راوتي یو. له موږ سره یوځای شئ.»
له اوږدو سیاسي ناندریو او لانجو وروسته، د ۲۰۲۴زېږدیز کال د فبروري په اتمه په پاکستان کې عمومي او ایالتي ټاکنې ترسره شوې چې د مسلم لیګ-ن ګوند په ګټه په کې د پراخو درغلیو ادعاوې وشوې او په پایله کې یې شهباز شریف د همدې ګوند له ادرسه واک ته ورسېد. له هماغې ورځې راهیسې تحريک انصاف او نور مخالف ګوندونه دغه ورځ د تورې ورځې په توګه نمانځي.
د پاکستان پوځ هغهمهال د ټاکنیزو پایلو د تحمیل په موخه لاریونونه سخت وځپل، زرګونه کسان یې ونیول او پر ضد یې قضیې پرانستې.
د اپوزیسیون مشر دا ورځ غندلې او له خپلو ټولو انساني او بنسټیزو حقونو څخه په استفادې يې د احتجاج کولو خبر ورکړی.
بل پلو، د خیبرپښتونخواه اعلی وزیر یوځل بیا په بند کې د تحریک انصاف ګوند د بنسټګر عمران خان روغتيايي وضعیت په اړه اندېښنه ښودلې او د نوموړي له قوله یې هغه ته د هر پېښېدونکي وضعیت مسوول د پاکستان د دفاعي ځواکونو مشر عاصم منیر بللی.
د تحریک انصاف ګوند مشر عمران خان ویلي: « که په بند کې هر څه را پېښ شول، مسوول به یې عاصم منیر وي.»
دې ټولو ته په کتو، شنونکي د پاکستان سیاسي وضعیت ناسم او له ګواښونو سره مخ بولي.
د سیاسي چارو شنونکی شېرحسن حسن وايي: « د پاکستان د حکومت او نظامیانو کړنو او ظلمونو عادي خلک او په ځانګړې توګه سیاسي فعالین تر پوزې رسولي او د صبر کاسه یې ډکه شوې. د پاکستان حکومت هغه ټول کسان نیسي، بندي کوي او د فعالیت مخه یې نیسي چې د امن غږ پورته کوي.»
د سیاسي چارو شنونکی عزیز معارج وايي: « د پاکستان اوسني سیاسي حالات او د وګړو راپورته کېدل او د لوېدیځ له خوا پرې فشارونه زیاتېدل څرګندوي چې غواړي په دې هېواد کې تحول راوړي او سیاسي نظام یې ور بدل کړي. انګېرنه داسې چې عمران خان به له زندان څخه خلاصېږي، بیا به ټاکنې کېږي او دی به د لومړي وزیر څوکۍ ته رسول کېږي. له دې وروسته به د پښتنو او بلوچانو حالات کنټرول کړي. اوس د دې کار مقدمه پيل شوې، ځکه ټاکنې په ۲۰۲۴ کال کې وشوې او تر اوسه هېچا غږ نه پورته کاوه، مګر اوس دا غږ پورته کېږي.»
د پاکستان اپوزیسیون یا تحریک تحفظ آیین پاکستان له څو مطرحو مخالفو احزابو تشکیل شوی ګډ جوړښت دی چې په کې د تحریک انصاف، ملي عوامي ګوند، د بلوچستان ملي ګوند، د سني مذهبو اتحاد شورا او مجلس اتحاد المسلمین په څېر ګوندونه په کې راټول دي او د شهباز شريف په مشرۍ د پاکستان ايتلافي حکومت پالیسۍ او سیاستونه ننګوي.
