ننګرهار کې د انځورګرۍ(نقاشۍ) او خطاطۍ د هنر یو شمېر استادان وايي، ورځ تر بلې د خلکو اقتصادي وضیعت خرابېدو، عصري ټکنالوژۍ زیاتېدو او ځوان نسل د لېوالتیا کمېدو له امله، دغه هنرونه د ورکې او سقوط له خطر سره مخ دي.
د دوی په خبره، پخوا په ننګرهار کې د یادو هنرونو له ۵۰ ډېر مرکزونه موجود وو، خو اوس دا رقم له نیم هم کم شوی او لامل یې دغو هنرونو ته د پاملرنې نه کېدل دی.
ننګرهار کې د خطاطانو او انځورګرانو ټولنې مشر شېرالرحمن وايي:« په تېرو وختونو کې موږ دلته د خطاطۍ شاوخوا پنځوس دوکانونه لرل، خو اوس دا شمېره تر شلو پورې راټیټه شوې.»
انځوګر ثاقب کاکړ وايي: « لامل یې دا دی چې نندارتونونه نه شته او دغه راز د هنر د ودې لپاره په ختیځ زون کې د هنرونو پوهنځی نه شته. که چېرې له دې وړاندې پاملرنه شوې وای، اوس به دا ستونزې ډېرې کمې وي.»
د خطاطۍ او انځورګرۍ هنر لارویان وايي، که د ختیځ زون په پوهنتونو کې د یادو هنرونو ځانګړې څانګې جوړې شي او دغه راز، د خطاطۍ او نقاشۍ اثارو لپاره په سیمه ییزه او ملي کچه نندارتونونه جوړ شي، دا هنرونه به د ورکېدو له خطر وژغورل شي.
خطاط صداقت وايي: « حکومت باید موږ ته یو مناسب ځای په واک کې راکړي، ترڅو خپل اثار په کې نندارې ته کېږدو او ځوانان دې کار ته وهڅول شي.»
خطاط خان ولي بارکزی وايي: « باید د افغانستان په کچه یو ملي نندارتون جوړ او دا خلک ورته راوبلل شي. که موږ نورې نړۍ ته وګورو، هغوی د هنر د هرې برخې لپاره د لیسانس تر کچې زده کړې کوي او ځانګړي پوهنځي لري.»
د ننګرهار اطلاعاتو او فرهنګ ریاست مسوولین په دې ولایت کې د انځورګرۍ او خطاطۍ هنرونو د ژوندي ساتلو په موخه د خپلو هڅو خبره کوي او وايي، په پلان کې ده چې راتلونکې نارنج ګل دودیزه مشاعره کې د دې هنرونوو د ژوندي ساتلو لپاره په دې برخه کې پنځول شویو اثارو ته ځانګړی نندارتون جوړ کړي.
د دوی په خبره، له دې سره به هنرمندان د خپلو توکو لپاره بازار ومومي او هم به خلک د دې هنر زده کړې ته وهڅېږي.
د ننګرهار اطلاعاتو او فرهنګ ریاست د اطلاعاتو آمر قریشي بدلون وايي: « سږ کال موږ دوی ته یوځای په پام کې نیولی، ترڅو دوی ته نندارتون جوړ کړو او هنر مندان په کې خپل اثار نندارې ته کېږدي.»
ننګرهار یو له هغو ولایتونو دی چې د انځورګرۍ او خطاطۍ هنرونه یې له اوږدې مودې راهیسې ژوندي ساتلي، خو وروستیو کې د عصري ټکنالوژۍ پراختیا، ماشیني تولیداتو زیاتوالي او د ځوان نسل د لږې لېوالتیا سربېره، د دې هنر له لارویانو څخه ملاتړ نه کېدل سبب شوي چې دا هنر کمرنګه او ان د ورکېدو له خطر سره مخ شي.
