د پښتون ژغورنې غورځنګ مشر وایي، له تیرو لسو ورځو راهیسې د پېښور پوهنتون د پښتنو محصلینو له لورې د پاکستان د پوځ په لاس د پښتنو وژنې، سړي تښتونې، تباهۍ، جګړو، د ځمکو غصب او د کانونو لوټلو پر ضد اعتراض روان دی.
منظور احمد پښتین د ياد اعتراض د غږ بدرګه کولو په موخه زياته کړې، چې د پاکستان پوځ د نوموړي په ټکو د ډالري جګړې او د ځمکو غصب لپاره عامه پښتانه په نښه کوي او وژني يې.
نوموړي د پوځ دې ظلم خلاف فعالان هم ناخوندي ياد کړي او زياته کړې يې ده، چې د نوامبر په ۱۲مه د پښتون ژغورنې غورځنګ پلاوی په خيبرپښتونخوا کې له امن جرګې د راستنېدو پرمهال د پاکستان استخباراتي ادارې له لوري تښتول شوي او اوس هم بې درکه دي.
د پښتون ژغورنې غورځنګ مشر منظوراحمد پشتین وايي: ((د پي ټي اېم د پلاوي تښتولو پر ضد د پېښور پوهنتون، د بنو پوهنتون، د فاټا پوهنتون او د خیبر پوهنتون محصلینو اعتراض وکړ او له دې وروسته له تېرو لسو ورځو راهیسې د پېښور پوهنتون محصلین په اعتراضي غونډه کې ناست دي، خو تر دې دمه نه د حکومت کومې فیدرالي او نه ایالتي ادارې له خوا محصلینو ته ډاډګیرنه ورکړل شوې. مونږ پښتنو محصلینو ته سلام کوو، چې تر خپله وسه یې د تښتول شویو محصلینو د حق په خاطر هڅې وکړې او اوس یې هم کوي.))
منظور احمد پشتین د پښتنو درد او غم شريک ګڼي او وایي، چې د کمولو لپاره يې هڅې کول یقینا اصلي انسانیت، میړانه او پښتنولي ده.
نوموړی زیاته کړې، هغه محصلین، چې په اعتراض کې يې ګډون ونه شوای کړای، نو په خواله رسنيو کې یې دې ملاتړ وکړي.
د پښتون ژغورنې غورځنګ مشر منظور احمد پشتین ویلي: (( مونږ د لادرکه محصلینو او د پي ټي اېم پلاوي او د دغه غورځنګ د بندي غړو د خوشي کولو په خاطر په اروپا او نورو هېوادونو کې د پي ټي اېم د غړو اقداماتو ته سلام کوو. ))
د پوځي او سیاسي چارو شنونکي وایي، پاکستان حکومت له تېرو څو لسېزو راهیسې د پښتانه ټول وژنې پروژې اخیستې او پاکستان تر کنټرول لاندې سیمو کې له پښتنو غواړي، چې پاکستان روانو پالیسو مخنیوي لپاره دې یو موټي شي او پاکستان دې خپل اساسي حقوق وغواړي.
د پوځي چارو شنونکی توریالی ځاځی وايي: (( د پښتون پر ضد دښمني د څو پېړیو راپه دې خوا پیل شوې په ځانګړې توګه د پاکستان په جوړېدو سره زیاته شوې ده. انګریزانو ستر ملت پښتون پر دوو برخو وویشلو، په کوزه پښتونخوا کې انګریزانو ۱۹۴۷ میلادي کال کې ۴۰۰ د پښتنو ښځې او ماشومان ووژل. پاکستان په سیمه کې د پښتنو د له منځه وړلو لپاره رامنځته شوی او پښتانه باید سره یو ځای شي. ))
د نړیوالو اړیکو شنونکی نجیب الرحمن شمال ورته خبره کوي خو زیاتوي: (( هیله من یم چې د پاکستان سیاست به تغیر وکړي او خپلې ستونزې به په خپلو کې حل کړي. ))
له دې مخکې هم د پښتون ژغورنې غورځنګ مشر منظور احمد پښتین له ټولو پښتنو غوښتي وو، چې د پاکستان د پوځ له لوري د ظلم خلاف ټول یو موټی شي او د یو بل درد له یو څو ورځو تېرېدو وروسته هېر نه کړي.
