د پاکستان راولپنډۍ په اډیاله زندان کې د جمعې په شپه د دې هېواد پخواني لومړي وزیر عمران خان او مېرمنې بوشرا بي بي ته یې د ۱۷-۱۷ کاله بند سزا واورول شوه.
نوموړی د ۲۰۲۳زېږدیز کال له اګست راهیسې په بند کې شپې ورځې تېروي او د فساد په بېلابېلو قضیو کې پر ښکېلتیا تورن دی چې د ګرانبیه دولتي ډالیو پلورل او د واکمنۍ پرمهال له واکه ناوړه ګټنه یې هم یوه برخه ده.
نوموړي د محکمې پر یادې پرېکړې تنده نیوکه کړې او پر جعلي بللو سربېره یې د پوځ مشر عاصم منیر د ځان پر وړاندې د دسیسو پر جوړولو تورن کړی.
خان له خپل مدافع وکیل سلمان صفدر غوښتي چې د دې پرېکړې په غبرګون کې های کورټ یا سترې محکمې ته وړانديز وکړي او پر خپلو پلویانو او د ګوند پر غړیو یې په ټول پاکستان کې د پراخو لاریونو غږ کړی.
د پاکستان پخواني لومړي وزیر عمران خان ویلي: « سهیل افریدي ته پیغام لېږم چې د سړکونو راوتلو او لاریونونو ته تیاری ونیسي. د پاکستان ټول خلک باید د خپلو حقونو د ترلاسه کولو لپاره ودرېږي.»
نوموړی په اډیاله زندان کې له خپل وکیل سلمان صفدر سره غږېدلی او له هغه يې غوښتي چې د محکمې د پرېکړې خلاف «های کورټ» یا سترې محکمې ته وړانديز وکړي.
هغه دغه راز ویلي، پاکستان دامهال د دې هېواد په وضعي قوانینو نه بلکې یوازې د مارشال عاصم منیر په خوښه د هغه په قانون چليږي چې په خبره یې، د ده پر وړاندې درج شوې قضیه او محکومېدل یې هم د همدې قانون برخه ده.
عمران خان په دې اړه ویلي: « دامهال پاکستان یوازې د عاصم په قانون چلېږي. دلته یوازې لیکل شوې فیصلې او پرېکړې اورول کېږي. له تېرو درېیو کلونو راهیسې د بې بنیاده پرېکړو او سزاګانو اورونې په څېر د توشه خانې دویمه قضیه هم زما لپاره کومه نوې خبره نه ده. دا پرېکړه هم د قاضي، کره ثبوتونو او د قانوني پړاوونو له تېرولو پرته په بېړه اورول شوې ده او زما او زما د وکیلانو خبرو او دلایلو ته ان چا غوږ نه دی ایښی.»
د عمران خان خور علیمه خان هم د پاکستان حکومت او په تېره بیا د عاصم منیر په ټولواکۍ د دې هېواد پوځ د خپلو ورور پر وړاندې په سازش کولو او دسیسو جوړولو تورنوي چې په خبره يې، د دې تر شا د خان د سیاسي پرستیژ او حیثیت خرابولو موخه هم پټه ده.
د عمران خان علیمه خان وايي: « دوی زما له وروره غواړي چې د خپلو خلکو د حقونو لپاره ونه درېږي. دوی ورنه غواړي چې هېواد پرېږدي او یا هم غلی چېرته کېني او سیاسي مسایلو پورې کار ونه لري. خو دا داسې یو هېواد دی چې په کې د عمران په څېر کس د یوې غاړکۍ له امله لس کاله زندان تېر کړي. هغه یې د همدې وړې موضوع له امله په ۱۷ کاله بند محکوم کړی. له همدې جوتېږي چې دا د هغه پر وړاندې سازش او د دسیسې جوړول دي.»
د سیاسي چارو شنونکي د پاکستان له وړاندې خراب سیاسي او امنیتي وضعیت ته په کتو، په دې بارو دي چې د عمران پر وړاندې د دې هېواد حکومت دریځ او د هغه پر اوږده بند محکومول ښايي هلته پراخو سیاسي کړکېچونو ته زمینه برابره کړي او هلته روان حالات لاپسې بحراني کړي.
د سیاسي چارو شنونکی عزیز معارج وايي: « دا یوه پروژه ده چې دوی یې پلې کوي، په دې کې ځینې چارواکي تبعید، ځینې نور ترور او یو شمېر بندي شوي دي. پاکستان د غربي نړۍ له خوا جوړ شوی مجري هېواد دی او د هغوی پروژې پلې کوي.»
په ۲۰۲۳زېږدیز کال کې د عمران خان له نیول کېدو سره هم د هغه سلګونه زره پلویانو او د تحریک انصاف ګوند غړیو په پلازمېنه اسلاماباد او د لاهور او کراچۍ په څېر د پاکستان په لویو ښارونو کې په پراخو لاریونو لاس پورې کړ چې وروسته پوځ په ډېر تشدد او د زور په کارولو سره غلي کړل.
