پاکستان له افغانستان سره د سوداګريزو لارو تړلو له امله رامنځته شوي کسر ځورېږي او زيان يې د دې هېواد له محاسبې څو برابره زيات دی.
ډان ورځپاڼې د افغانستان او پاکستان د سوداګرۍ ګډې خونې له قوله راپور ورکړی چې وړاندې پاکستان په ورځني ډول له ۵۰ تر۶۰ ميليون ډالرو افغانستان ته صادرات لرل، خو د لارو له بندولو راهيسې، دغه صادرات بند شوي او له امله یې شاوخوا ۴.۵ میليارد ډالره زيان کړی.
د پاکستانۍ ډان ورځپاڼې راپور کې راغلي: « موږ افغانستان ته د ځینو مهمو موسمونو پرمهال په ځانګړي ډول په کرنې او ودانیزو چارو کې په ورځني ډول له ۵۰ تر ۶۰ میلیون ډالرو صادرات لرل. موږ به هره ورځ افغانستان ته سمنټ، بوره، کېنو یا لیمو، نارنج، کچالو، درمل او د جراحي وسایل لېږل. د دې لارو له تړل کېدو سره دا په ټپه ولاړ دي او پاکستان ته یې له امله ۴.۵ میلیارد ډالرو څخه زیات زیان اوښتی.»
د افغانستان او پاکستان د سوداګرۍ ګډې خونې خبرداری ورکړی چې که دا وضعیت ادامه ولري، نو د نارنجو او کچالانو په څېر به یې نور موسمي صادرات هم چې له روانې ډسمبر تر مارچ میاشتې پورې ترسره کېږي، شاوخوا ۲۰۰ میلیون ډالرو په ارزښت زيان وويني.
یو شمېر افغان سوداګر بیا وایي، له پاکستان سره د سوداګرۍ له درېدو وروسته اوس ګڼ شمېر افغان سوداګر هڅه کوي چې د دې هېواد په ځای په بدیلو لارو غور او کار وکړي.
سوداګر عبدالجبار ساپی وايي: « موږ پوهېږو چې د افغانستان او پاکستان ترمنځ د تجارت کچه صفر شوه، خو افغانستان وکولی شول چې نورو هېوادونو ته لاره پيدا کړي او خپل صادرات ور ورسوي. د خدای شکر دی موږ په لوړه کچه زیانمن نه شوو، خو پاکستان میلیاردونه ډالر زیان وکړ. دوی هغه توکي نورو ګاونډيانو ته نه شي صادرولی چې افغانستان ته یې صادرول.»
افغان سوداګر محمد رفیع ابراهیمي وايي: «مخکې کلونو کې به پاکستان هرځل هغه مهال لاره بندوله چې د افغانستان د تازه مېوو او ترکاریو فصل به را ورسېد. فرضي دروازې به تر هغو تړلې وې چې زموږ فصلونه به ختم شول.»
پاکستان له کلونو راهیسې د افغانستان له لارې له منځنۍ اسیا هېوادونو سره سوداګري کوي، خو څارونکي باوري دي چې که پاکستان له افغانستان سره په سوداګرۍ کې خپلو چلن مثبت لوري ته بدل نه کړي، نو د نورو سوداګريزو زيانونو انتظار دې هم کوي.
د اقتصادي چارو شنونکی یونس ځدراڼ وايي: « د افغانستان لارې او بندرونه د پاکستان لپاره ډېر ګټور وو، دوی له منځنۍ آسیا سره تجارت کاوه او افغانستان هم د دوی د توکو لپاره ښه مارکېټ و. کله چې دا تجارت ولاړ وي، پاکستان به نور هم زیانونه کوي.»
د افغانستان او پاکستان ترمنځ له سیاسي ترینګلتیا وروسته، له تېرو دوو میاشتو راهیسې د دواړو هېوادونو تر منځ ټولې سوداګریزې لارې او راکړه ورکړه په ټپه ولاړ دي. اسلامي امارت پر افغان سوداګرو غږ کړی چې د دې هېواد په ځای په نورو بدیلو لارو فکر او راکړه وکړه وکړي.
