په بلوچستان، خيبرپښتونخوا او قبايلي سيمو کې د ناامنيو له زياتېدو سره هم مهاله، د پاکستان پوځ د ملکي او ديني ودانیو په نښه کولو تورن شوی او د تازه راپورونو له مخې، د کورمې ايجنسۍ په مناتو کې یې د ليل ګدا په نوم جومات باندې بمونه غورځولي دي.
له دې وړاندې، د خیبرپښتونخوا اعلی وزیر محمدسهيل افريدي هم ویلي و چې د پاکستان پوځ په قبایلي سیمو کې د خپلو عملياتو پر مهال اسلامي ارزښتونو ته سپکاوی کوي.
اوس پوښتنه داده چې ولې پاکستان د حساسيتونو زياتولو لپاره ديني ودانۍ په نښه کوي؟
د سياسي چارو شنونکی توريالی ځاځی وايي: « پاکستان په سیمه کې د اسلام دین او مسلمانانو د نوم بدولو لپاره جوړ شوی. موږ په تېرو څو لسیزو کې عملا ً ولیدل چې په کوردننه او افغانستان کې یې هر ډول بشر ضد جنایتونه ترسره کړل. کوم زیان چې پاکستان د اسلام دین ته اړولی، د نړۍ هېڅ یو هېواد نه دی اړولی.»
د رویټرز خبري اژانس د راپور پر بنسټ، په کورمه کې د پاکستاني پوځيانو پر يوه ځايي پوسته برید کې چې مسووليت لا کومې ډلې نه دی منلی، شپږ پوځيان وژل شوي او څلور نور ټپيان دي.
له دې سرهممهاله، په بلوچستان کې د بلوڅانو د ازادۍ غورځنګونو(بياېلاې او بياېلاېف) ادعا کړې چې په څو سيمو کې يې پر پاکستاني پوځيانو مرګوني بريدونه کړي او درنه مرګ ژوبله یې ور اړولې ده.
د دوی په خبره، له مرګ ژوبلې اړولو سربېره یې ګڼ پوځي تجهيزات هم ترې ترلاسه کړي دي.
د بلوڅ ازادي غوښتونکي غورځنګ له خوا په خپره کړې اعلامیه کې ادعا شوې چې په دې بريدونو کې يې ۱۱ پاکستاني پوځيان وژلي او يو بل يې ژوندي نيولی.
د بلوڅ ازادي غوښتونکي غورځنګ اعلامیه کې زیاته شوې: « په مستونګ، مند او کوېټه کې مو پر پنجابي اشغالګرو ځواکونو بريدونو کې ۱۱ پاکستاني پوځيان ووژل او د ظفرالله په نوم يو بل پوځي چې د جانداد خان زوی دی، ژوندی نيولی دی.»
د چارو څارونکي په دې باور دي چې د پاکستان پوځي رژيم پر وړاندې شته امنيتي ننګونې د هغو پاليسيو محصول دی چې اسلام اباد له څو لسیزو راهیسې پر محکومو قومونو پلې کړې دي.
د سياسي چارو شنونکی عزيز معارج وايي: « په پاکستان کې هرحالت او حرکت په بشپړه توګه د دې هېواد د استخباراتي ادارې له خوا کنټرول کېږي او هر ډول فعالیت د پوځیانو له خوا د مخکني پلان له مخې په عمدي توګه کېږي. دا چې دوی د پښتنو او بلوڅانو په سیمو کې اسلامي مقدسات په نښه کوي او کله هم ملکي وګړي، دوی غواړي دا خلک را وپاروي او کله چې خلک وپارېدل، دوی بیا ځي د ترهګرۍ او ټيټيپي په نوم هغه کسان په نښه کوي چې ازادي او حقوق غواړي. دا یوه داسې لوبه ده چې د پاکستان پوځ د څارګرې ادارې(آیاېسآی) د معلوماتو پر بنسټ پيل کړې. دا پروژې دوی له غربي نړۍ اخلي او یوازې یې د پښتنو او بلوڅانو په سیمو کې عملي کوي.»
بله خوا، د پيسو نړيوال صندوق(آیاېماېف) پاکستان ته د ۱.۲ میليارد ډالرو د پور ورکړه تصویب کړه. د دې صندوق چارواکو ویلي، دا پيسې به اسلام اباد ته په څه باندې ۳۰ قسطونو کې د ځانګړو شويو شرايطو له مخې ورکړل شي.
د راپورونو له مخې، د پاکستان لړزاند اقتصاد د دې هېواد پوځي رژيم اړ کړی چې د خپلو ننګونو د نسبي حل لپاره هر کال د پيسو له نړيوال صندوق څخه پور واخلي.
