په دې وروستيو کې د خیبرپښتونخواه په قبايلي سيمو، بلوچستان او د پاکستان تر کنټرول لاندې نورو سیمو کې د دې هېواد پوځي رژيم پر وړاندې جګړه تر دې حده سخته شوې چې د ځینو په باور، د دې هېواد پوځ او امنیتي ادارو یې د مخنیوي توان له لاسه ورکړی.
د پاکستان پوځي رژیم له خوا د شمالي وزیرستان لپاره ټاکل شوی مرستیال کمېشنر شاه ولي او درې تنه ساتونکي یې تازه په یوه وسلهوال برید کې وژل شوي او دوه نور کسان ټپیان دي.
د یاد برید مسوولیت تر اوسه کومی ډلې په غاړه نه دی اخیستی. په ورته مهال، په خواله رسنيو کې د پاکستاني طالبانو تحریک(ټيټيپي) ته منسوبو ادرسونو ادعا کړې چې په قبايلو کې يې پر پاکستاني پوځیانو مرګوني بریدونه کړي.
ټيټيپي د جنوبي وزیرستان په سرارواغې سیمه کې شاوخوا ۲۰ پاکستاني پوځيانو ته د مرګ ژوبلې اړولو خبر هم ورکړی او دغه راز د هغه ډرون برید ویډیو یې خپره کړې چې په میرانشاه کې یې د پاکستاني پوځیانو مرکز په نښه کړی.
د دې ترڅنګ، په بلوچستان کې د بلوڅ آزادي غوښتونکي غورځنګ(بياېلاې) په تازه خپره کړې اعلامیه کې ویل شوي، د نومبر له ۲۸مې تر ۳۰مې نېټې یې د پاکستان پوځي رژیم پر وړاندې په نږدې ۳۰ پلان شویو بریدونو کې له ۴۰ زیاتو پاکستاني پوځيانو ته مرګ ژوبله اړولې.
بلوڅ آزادي غوښتونکو غورځنګ ویلي: « د نومبر له ۲۸مې تر ۳۰مې پورې آزادي غوښتونکو جنګیالیو د پاکستان اشغالګرو پوځيانو پر وړاندې ۲۹ هدفمند بریدونه پلان کړل چې په کې ۲۷ پاکستاني اشغالګر پوځيان وژل شوي او ۱۷ نور ټپیان دي.»
د بلوڅ آزادي غوښتونکي غورځنګ(بياېلاې) ترڅنګ بلوڅ آزادي غوښتونکو جبهې هم ویلي چې د بلوچستان په نوکندۍ سیمه کې د سادو په نوم د پوځي عملیاتو په بشپړولو سره یې د هغو کانونو د استخراج مخنیوی هم کړی چې د بهرنیو کمپنيو له خوا سپړل کېدل.
د سیمه ییز وضعیت څارونکي وايي، د پاکستان پوځي رژیم د خپلو ناسمو پالیسیو له امله په کور دننه له پراخ تقابل سره مخ دی او له لسیزو راهیسې له بلوڅو، پښتنو او یو شمیر نورو قومونو سره د ياد رژيم توپیري چلن د دې وروستیو ناکراریو اساسي لامل دی.
د سیاسي چارو شنونکی عزیز معارج وايي: « پاکستان د خپلو چارواکو د غلطو پالیسو، غلطو سیاستونو، ناسمو محاسبو، ظلم او فساد له امله د نا امنیو ښکار شوی. اوس د دوی ملتونه هم د حکومت په ضد راپورته شوي، ګاونډیان یې هم ناراض دي او د چین له امله یې غربي نړۍ ته هم باور له لاسه ورکړی.»
د سیاسي چارو شنونکی عبدالواحد فقيري وايي: « د پاکستان امنیتي، سیاسي او اقتصادي وضعیت ورځ تر بلې خرابېږي. د پاکستان حکام د دې پرځای چې د خپلو ستونزو غم وخوري، ښکاري چې په لوی لاس نورې ستونزې هم ځان ته ایجادوي. زه فکر کوم چې د پاکستان وضعیت به لا خراب شي، سیاسي حالات به یې لا کړکېچن شي او له ګاونډیو سره به په نورو لانجو واوړي.»
د پاکستان پوځي رژیم امنیتي او اقتصادي ترینګلی وضعیت داسې مهال د لا خرابېدو خواته روان دی چې هلته لا هم د یو شمېر مطرحو سیاسي ګوندونو فعالیتونه له جدي خنډونو سره مخ دي.
د پاکستان تحریک انصاف ګوند(پيټيآی) بنسټګرعمران خان زوی قسیم خان رویټرز ته ویلي، له پلار سره يې اړیکې پرې شوې او کورنۍ يې د نوموړي روغتیايي وضعیت په اړه اندېښنه لري.
د پاکستان پخوانی لومړی وزیر او د یاد ګوند بنسټ اېښودونکی د ۲۰۲۳ زېږدیز کال په اګسټ کې د اداري فساد په تور ونیول شو او دا مهال زنداني دي.
