په دې وروستیو کې د پاکستان امنیتي، سیاسي او اقتصادې وضعت تربل هر وخت زیات خراب شوی او په اسلاماباد کې وروستۍ چاودنې وښوده چې له يادې ناامنۍ يې پلازمېنه هم خوندي نه ده.
شنونکی دې ناامنۍ ته په پام وايي، پاکستان د خپل امنيتي وضعيت کابولو کولو په ځای تل د دې وضعيت پړه پر نورو هېوادونو اچولې او دې چلن يې د ضعف اثباتولو ترڅنګ، له ګاونډيو سره د باور فضا هم زيانمنه کړې.
د سیاسي چارو شنونکی توریالی ځاځی وايي: « د پاکستان د خراب وضعیت لامل خپل پاکستاني چارواکي دي. پاکستان په سیمه کې د لوېدیځ یوه پروژه ده؛ دا حالت چې پاکستان اوس ورسره مخ دی، هم په سیاسي لحاظ او هم په اقتصادي او بشري لحاظ نړۍ ته د منلو وړ نه دی.»
د سیاسي چارو شنونکی شهسوار سنګروال وايي: « دا نا امنۍ که له دې وړاندې په خیبر پښتونخوا یا بلوچستان کې وې، اوس یې لمنه تر اسلام اباد رسېدلې. لامل یې دا دی چې د پاکستان پوځ نه شي کولی دا نا امنۍ کنټرول کړي او حالات عادي بڼې ته را وګرځوي.»
ځينې نور شنونکي د ترهګرۍ تمويل او تجهيز په اړه د پاکستان پالیسۍ د سيمې لپاره هم خطرناکې بولي او زياتوي چې پاکستان عملا د خپلو دې پالیسيو بيه پرې کوي.
د چارو شنونکي خبرداری ورکوي چې که اسلاماباد په خپلو پالیسيو او چلن کې بدلون را نه وړي، د ځان ترڅنګ به سيمه هم په اور وسوځوي.
د سیاسي چارو شنونکی محمد اسماعیل ځدراڼ وايي: « د پاکستان د اوسني وضعیت لامل د دوی هغه پالیسۍ دي چې په کور دننه او بهر کې یې د فعالیتونو لپاره جوړولې. دوی اوس په خپلو جوړو کړیو لومو کې بند دي او په پراخو ستونزو کې ښکېل دي.»
د پاکستان تر کنټرول لاندې قبايلي سيمو، خيبرپښتونخوا او بلوچستان کې هره ورځ پر پاکستاني پوځيانو خونړي بريدونه کېږي چې پاکستان يې د استانبول په مذاکراتو کې له اسلامي امارت د مهارولو غوښتنه کړې وه.
د افغانستان اسلامي امارت وايي، په يادو سيمو کې د روانې ناامنۍ کابو کول د کابل نه بلکې د اسلاماباد مسووليت دی.
