د پاکستان پخواني لومړي وزیر عمران خان یو ځل بیا له زندان څخه په پیغام کې ویلي، په پاکستان کې د اساسي قانون پر ځای د عاصم منیر قانون عملي کېږي او په خبره یې، دا سړی د تاریخ تر ټول مستبد واکمن دی.
خان زیاته کړې، د عاصم منیر واکمني د بشري حقونو نقض او د ښځو او ماشومانو حقونو ته په کې سپکاوی کیږي.
د پاکستان پخواني لومړي وزیر عمران خان زیاته کړې: « اوس زموږ په هېواد کې نه د اساسي قانون واکمني شته او نه د قانون حاکمیت. پر ځای یې د عاصم قانون واکمن دی. عاصم منیر د تاریخ تر ټولو ظالم دېکتاتور دی او ذهني توازن نهلري. د ده د واکمنۍ پر مهال ظلم تر ټولو لوړې کچې ته ورسېد. د ده رژیم نه ښځو ته درناوی لري او نه له ماشومانو او سپینږیرو سره د ترحم کوم حس لري او هغوی له خپلو حقونو بې برخې دي. عاصم منیر د خپلې څوکۍ او قدرت لپاره هر څه ته تیار دی.»
د عمراه خان په خبره، د عاصم منیر د واک تنده دومره ډېره ده چې د خپل قدرت د ساتلو لپاره هر ډول کار او معاملې ته غاړه ږدي.
له دې سره سم، د سیاسي چارو کارپوهان هم د عمران خان څرګندونې تاییدوي او وایي، له تېرو څو لسېزو راهیسې واک له ولس اخیستل شوی او پوځي رژیم پرېکړې کوي. دوی خبرداری ورکوي چې دا تګلاره به د پاکستان حکومت عمر لنډ کړي.
ځينې نور کارپوهان بیا په پاکستان کې روانه امني او سیاسي بې ثباتي نه یوازې د دې هېواد لپاره خطرناکه ګڼي بلکې د سیمې هېوادونو لپاره یې هم ننګونه بولي.
دوی وايي، که پاکستان کې دننه د خلکو په خوښه بدلون رانه شي، هلته د روان کړکېچ بدې پایلې به ګاونډ او ان د سیمې هېوادونه هم زیانمن کړي.
د سیاسي چارو کارپوه فیض محمد ځلاند وايي: « ترڅو چې په پاکستان کې واقعي ملکي حکومت رامنځته نه شي، د نظامي حکومت د شته والي له امله به نه یوازې خپله په ستونزو کې وي بلکې سیمه به هم ورسره نا امنه وي. د پاکستان ملکي ادارې باید ټول په ګډه د ولس ترڅنګ ودرېږي او مدني حرکتونه وکړي. د پاکستان نظامیان نه یوازې سیمه کې د تروریزم او نا امنیو خپرولو دسیسې پرمخ وړي بلکې په کور دننه هم د وحشت، دهشت او تښتونې پالیسي پرمخ وړي. په دې اړه باید ملګري ملتونه، د شانګهای تړون او د مسکو فارمټ هم هڅې وکړي.»
د پوځي چارو کارپوه توریالی ځاځی وايي: « دا چې عمران خان وايي عاصم منیر یو مستبد شخص دی، دا نوې خبره نه ده بلکې د پاکستان جوړېدو راهیسې د دې هېواد ټول واکمنان مستبد حکمرانان وو. د نړۍ په کچه د پاکستان د پوځ او استخباراتي ادارې په پرتله بله جنایت کاره ډله نه شته. د هر هېواد پوځ د خپلو پولو د ساتنې لپاره جوړېږي نه د دې لپاره چې په ګاونډیو او نړیوالو هېوادونو کې نا امنۍ رامنځته کړي. پاکستان په اصل کې د ترهګرو ډلو ځاله ده او دا هرڅه د پوځ ترسیوري لاندې کېږي. تر هغو چې پاکستان د نړۍ له خوا تحریم نه شي، پاکستان به هېڅکله له خپلو تروریستي اعمالو په شا نه شي.»
د پاکستان پخواني لومړي وزیر عمرانخان څرګندونې داسې مهال دي چې د پاکستان کورنی سیاسي وضعیت له سختو ننګونو سره مخ دی. د حکومت په کچه ټولې پر ېکړې د پوځي رژیم له خوا ترسره کېږي او له عام ولس یې د ژوند کولو، عدالت او انصاف غوښتنې حق هم اخیستی دی.
عمران خان له دې وړاندې هم ویلي و چې په پاکستان کې روان سياسي ناورين چې په لنډمهال کې يې د کرارېدو هيلې نه شته، د دې لامل شوی چې خلک د پوځ، ملکي حکومت او د مخکیني لومړي وزير عمران خان پر پلويانو ووېشل شي.
