زلمي خليلزاد خبرداری ورکړی چې که په پاکستان کې دننه د خلکو په خوښه بدلونونه رانه شي، ښایي دغه هېواد لا نورو سختو ننګونو سره مخ شي.
نوموړي دغه خبرې د پاکستان بهرنیو چارو پخواني وزیر بلاول بوټو زرداري د هغو څرګندونو په غبرګون کې کړې چې وايي، غواړي د پاکستان اساسي قانون د ۲۷مې مادې پر تعدیل ناسته او غور وکړي.
بلاول بوټو زرداري ویلي وو چې د مسلم لیګ نواز ګوند د لومړي وزیر شهباز شریف په مشرۍ د پاکستان ولسي ګوند له استازو سره د دې هېواد د اساسي قانون د ۲۷مې مادې پر تعدیل خبرې کړې دي.
دا د پاکستان اساسي قانون هغه ماده ده چې په دې هېواد کې د ایالاتونو او فډرالي حکومت ترمنځ د واک توازن او ځینې نورې قانوني چارې روښانه کوي.
د پاکستان بهرنیو چارو پخوانی وزیر بلاول بوټو زرداري ویلي: « د مسلم لیګ نواز ګوند استازي د لومړي وزیر شهباز شریف په مشرۍ راغلي وو او د پاکستان ولسي ګوند یا پيپل پارټۍ له استازو سره د اساسي قانون پر ۲۷مې مادې وغږېدل، ترڅو په دې برخه کې تعدیل رامنځ ته شي. په دې تعدیل کې د اساسي محکمې جوړول، اجراییوي قاضیان، د صوبو د ونډې مدیریت او د زده کړو او نفوسو پلان جوړونې واک بېرته فډرالي حکومت ته سپارل شامل دي.»
بلاول بوټو زرداري همدارنګه وړاندې ویلي، د اساسي قانون پر یادې مادې به د نومبر په ۶مه ناسته ولري.
د افغانستان سولې لپاره د امریکا پخواني ځانګړي استازي د نوموړي دې څرګندونو ته په غبرګون کې ویلي، د پاکستان راتلونکي لپاره مهمه ده چې په اساسي قانون کې د پام وړ او د ولس په خوښه بدلونونه راشي.
زلمي خلیلزاد پر خپله ایکس پاڼه لیکلي، ولس حق لري چې د خپلو غوښتنو لپاره غږ پورته کړي او که داسې ونه شي، ښایي پاکستان لا نورو سختو ننګونو سره مخ شي.
د افغانستان سولې لپاره د امریکا پخواني ځانګړي استازي زلمي خلیلزاد ویلي: « په پاکستان کې د مسایلو حل په موخه اړتیا ده چې عام خلک خپل نظر څرګند کړي. په دې هېواد کې اوسنی وضعیت خورا حساس دی او اړتیا لېدل کېږي چې د اختلافونو او وېشلو په ځای د یووالي لپاره په کې کار وشي.»
د چارو څارونکي هم وایي، د پاکستان اوسنی وضعیت ورځ تر بلې د پاشل کېدو لورته روان دی او اړتیا لیدل کېږي چې په دې هېواد کې واک د پاکستاني رژیم په ځای خلکو ته انتقال شي.
د کارپوهانو په خبره، هلته له لسیزو راهیسې واک له ولس اخیستل شوی او پر ځای پوځي رژیم پرېکړې کوي.
د سیاسي چارو شنونکی خلیلاحمد نادم وايي: « د نورو هېوادونو لکه افغانستان او هندوستان په کورنیو چارو کې مداخله هغه عوامل دي چې اوس به د پاکستان د تجزیې سبب ګرځي. دا روښانه خبره ده چې پاکستان ورځ تر بلې خرابېدو خواته روان دی او موږ به یې په نږدې وختونو کې تجزیه ووینو.»
د چارو یو شمېر نور څارونکي بیا وایي، اوس مهال پاکستان له درېیو لویو امنیتي، سیاسي او اقتصادي ننګونو سره مخ دی او حکومت یې د ستونزو حل په ځای ستونزې لا زیاتوي.
د سیاسي چارو شنونکی واحد فقیري وايي: « د پاکستان مشران د دې په ځای چې خپلو ستونزو ته متوجه شي او د بحرانونو هوارولو لپاره لارې پيدا کړي، لګیا دي او هڅه کوي چې افغانستان او هندوستان ملامت کړي. ریښتیا خبره دا ده چې پاکستان په یوه څاه کې لوېدلی، خو له څاه څخه د ځان ایستلو په ځای نور هم ځان غرقوي.»
له تېرو څو لسیزو راهیسې د پاکستان کورنی سیاسي وضعیت له خورا سختو ننګونو سره مخ دی او ولسي خلک یې وخت ناوخت پر وړاندې پراخ لاریونونه او پرلټونه کوي، خو د کلونو په تېرېدو سره لا هم د دې هېواد پوځي رژیم د خپلو ولسي خلکو غوښتنو ته غاړه نه ده ایښې.
